小說

當首爾仍是叫漢城的那些年(伍拾貳)

歷劫還是在一起,這種堅決無人可比。 圖:Tobyhk © 傳統、習俗,往往係一個民族賴以為生、代代相傳嘅「承傳」。好多時候,傳統會被視為一個民族嘅瑰寶。作為該民族嘅一份子,會挺身悍衛佢哋嘅傳統價值。 傳統習俗有好有壞,但係對於某啲民族嚟講,好同壞都係傳統,應該全數接受同保護。故此,好多傳統糟粕,都因為呢個理由而受到保護。 就好似當你有機會睇一啲有關3K黨嘅紀錄片或者當事人訪問,佢哋都會話你聽,佢哋加入Ku Klux Klan係要「保衛傳統」、「保護歷史」。 喺呢個「當東方遇上西方」嘅二十世紀,東方傳統價值受到唔少嘅挑戰。然而,呢場唔係一面倒嘅侵略戰,係一場攻防戰。攻擊越大,反撲越烈。 五月某星期日早上,屋企。 「小美?」我求救。「我樽aftershave喺邊呀?」 「梳妝檯左面第一個櫃桶。」煮緊早餐嘅Chloe喺廚房伸個頭出嚟答我。 我如言,樘開佢梳妝檯左面第一個櫃桶,搵到我樽aftershave,但同時都搵到隻類似咁嘅物體: 隻嘢右手寫住「Alan」,左手寫住「바보 」,心口插咗幾支針,名乎其實嘅「心口針」。 「小美,」我再叫佢。「過一過嚟吖。」 「咩事?」佢伸個頭入睡房望住我。 「佢係邊位呀?」我向佢揚一揚我嘅「愛的替身」。 「佢呢,」Chloe𠵱起棚牙尷尷尬尬咁笑。「佢咪就係蠢蛋Alan囉!喺咪同你好似樣呢?」 「咁點解佢心口插滿針嘅呢?」我笑住問佢。 「因為佢曳呀,」Chloe笑住解釋。「因為佢不解溫柔,唔知我鍾意佢,所以咪插醒佢囉。」 「你唔驚你啲法力太高強,插死咗我咩?」我真心覺得好cute囉。 「放心啦,」佢攞返隻woodoo公仔,摸一摸佢個頭。「百濟公主針指好好㗎!啱啱好,唔會多唔會少;我哋而家咪喺埋一齊囉!」佢放返隻公仔入櫃桶。然後出去繼續煮早餐。 我吼佢行轉背,打開個櫃桶,喺個公仔身上,掹返晒啲針出嚟。 小心駛得萬年船。 早上九點,漢南洞路德會。 Continue reading »


當首爾仍是叫漢城的那些年(伍拾壹)

圖:Tobyhk © 前塵舊事偏偏多記憶心中種種歎息都烙下印潮濤永遠衝不去 心裡面 往日痕 首先,我哋要暫且將近年嘅中港矛盾放低一陣(一陣咁多啫,我冇賣屎忽投共;OK?),否則我而家要講嘅嘢,你一句都唔會聽得入耳。 上海,其實係我最鍾意嘅中國城市,沒有之一。 如果有得選擇的話,我諗我真心鍾意嘅,係1930年代嘅上海;一個有租界、華洋雜處、有杜月笙黃金榮張嘯林之類嘅大亨嘅上海。用香港人熟悉嘅語言嚟講,一個有丁力、許文強嘅上海。 一個借來時間同空間嘅上海。 一個《十八春》同《色,戒》裏面嘅上海。 一個感性嘅上海。 (寫呢啲,呢篇想搵人望多眼都難……) 上海虹橋機場,入境大堂。 條入境人龍排到去南澳以南,我同Chloe當然無可避免置身人龍之中。 唔怪得之中國人都喜以「龍的傳人」自居,咁排法想唔做傳人都難。 「아가 !아가 !」Chloe英韓並用咁撩緊排喺我哋前面個媽媽抱住嘅BB。「Baby! Baby! 아가 !」 佢用手指摸個BB嘅面珠,個BB捉住佢隻手指擺入口咬;佢冇縮不特止,仲笑得好開心好甜;母愛泛濫嘅Chloe其實好鍾意BB;我就鍾意睇佢多過鍾意睇BB。 「咁鍾意BB,自己生返個囉。」我其實係隨口噏,真係冇諗任何嘢。 「Alan,有件事,我諗我應該要同你講;」Chloe擰過嚟同我講。「其實,我冇得生㗎。」 「我……唔明……」唔明,但sense到自己講錯嘢。 「十七歲嗰年,一次PMS痛到暈咗,」Chloe好平靜咁解釋。「學校送咗我入醫院,醫生照到我輸卵管有問題,詳細係點我都唔識講,總之我生BB嘅機率,係正常女性嘅十萬分之一;所以我係唔會有BB㗎。」 Continue reading »


當首爾仍是叫漢城的那些年(伍拾)

圖:Tobyhk © 你哋同最親密嘅人之間,係點樣互相稱呼對方㗎?撇開黃子華嘅「BB、豬豬」笑話,我相信,每一對情侶之間,都有佢哋最個人、最私密嘅稱呼。 我同Chloe嘅情緣始自一句「蠢蛋」。最初係佢叫我蠢蛋,然後我禮尚往來,叫返佢做蠢蛋。「바보 」(Papo)一詞喺韓文嘅應用係好廣泛嘅,既可以係情侶之間嘅暱稱,亦可以係開拖之前嘅最後對話;視乎你點用,同用咩語氣講。 「蠢蛋」以外,我哋仲發展咗好多名花出嚟。但係無論我哋將對方嘅花名,改到天花龍鳳都好,喺我哋心目中,真真正正嘅甜蜜回憶、我哋真真正正互相承認嘅稱呼,都係「蠢蛋」。 그래서 넌 내 사랑 바보고. 復活節假期前夕,大韓航空KE603往香港航班。 「百厭公主,」我遞份入境表俾Chloe。「填咗份入境表啦,有冇筆?」 「係百濟公主呀蠢蛋,」Chloe接過入境表,拎筆出嚟填。「點解公主入境都要填表喎?」 「咁你百濟俾人亡咗國嘛,」唔知點解,我開始學識陪佢癲。「到你第時復國咪唔使填表,仲有紅地氈同儀仗隊歡迎你𠻹呀。」 「咁好啦。」佢低頭填表;有時我懷疑,究竟佢係真黐定假傻。 喺韓國,復活節係冇公眾假期嘅,但我學校係基督教學校,所以有一個星期學校假。Chloe原本都係冇假期,但係呢條女為咗「溫仔」,死度爛度,俾佢度到一個星期假。 於是我哋決定嚟個一星期香港、上海之旅。 同日下午,港島區某住宅。 「Ms Kim, have some tea, make yourself Continue reading »


當首爾仍是叫漢城的那些年(肆拾捌)

Chloe의童夢이루어집니다 圖:Tobyhk © 喺一段正常嘅感情生活入面,理論上,我哋每日無時無刻,都係愛緊同一個人。所以理論上,應該日日都係情人節。 好地地咁咪幾好囉,偏偏我哋又要阿茂整餅,走去揀一日做「情人節」。咁即係點呀?我明明日日都已經愛緊你,點解喺每年情人節,我又要對你表示「我愛你」?咁我喺呢日愛你,其餘嗰364日係咪唔使愛你? 媽,我好亂呀! 平日五百(港幣;下同)一打玫瑰,情人節賣兩千。平日五百一餐燭光晚餐,情人節兩千。好明顯,情人節並唔係向荷包同銀行戶口示愛嘅日子。 人類都係喜歡作繭自縛。 (條副題我係玩緊嘢,真正韓文唔會咁寫,應該係「Chloe의 어린 시절 꿈이 이루어집니다. 」;寫返出嚟費事俾人叉輪廚。) 1998年2月14日,星期六,情人節;係我同Chloe嘅第一個情人節。 呢個亦係Chloe咁大個女,第一個有男朋友嘅情人節;今次第二次拍拖嘅佢,之前嗰段關係,等唔到呢一日。 如果以女仔平均由十二歲開始,就夢想有個完美嘅情人節嚟計,廿二歲嘅Chloe,發呢個夢發咗十年。今年,1998年,佢終於「叫糊」。而佢嘅Valentine,就係我:起晒躲嘅「Heartless little shit」。 如果,呢次我搞「喎」咗Chloe個情人節,亦即係話,我親手摧毀咗一個少女嘅十年夢想。 God save Chloe Kim。 早上八點,跑步時間。 原本係五點半嘅,但自從Chloe週末入嚟過夜之後,我就冇可能五點半起到身。因為佢瞓覺嗰陣,鍾意用佢嗰42吋拑住我條腰同下盤,我動彈不得,只能夠趁佢轉便先可以甩身。 Continue reading »


當首爾仍是叫漢城的那些年(肆拾柒)

圖:Tobyhk © 不經不覺,由學堂重遇到而家,我同Chloe已經認識咗四個幾月。喺呢漫長嘅四個幾月裏面,無論我哋嘅關係,係朋友定係情侶,我哋都花咗好多時間喺對方身上。 從中秋節開始,我哋平均每星期見面三四次,往後嘅日子繼續增加;直到開始拍拖後呢個零月,我哋已經差唔多日日見面。按照呢個進展,我同Chloe同居,只不過係時間問題。 當年我同Colette都係咁。 只不過,對於韓國呢個國家,我仍然非常陌生;只係知道佢比香港保守。我實在唔清楚,我同Chloe喺呢個咁嘅社會環境之下,究竟同居係咪一個可行嘅方案。 更何況,我其實唔係100%肯定,我有足夠心理準備,開展另一段同居關係。(留意返:係唔夠心理準備,唔係冇。) 一二月天時去濟州,其實係個唔錯嘅時間。喺漢城,呢啲月份通常都係凍到唔想出街嘅月份;濟州就唔同,睇天氣預測,日間起碼有十度八度。對香港人嚟講,十度八度都仲係好凍;但對於漢城居民(即係我呢個漢城居民),十度八度係好舒適嘅氣溫。 一月尾,農曆新年。濟州島,西歸浦(서귀포 /Seogwipo)。 農曆年,成個星期假,我同Chloe決定去濟州旅行。其實最初我哋嘅選擇係釜山,但係去咗一日之後,發覺釜山過年悶到發慌,所以臨時決定轉地頭;改去濟州玩。 其實去邊度玩,我哋都冇乜所謂,只係想行開吓。成日喱埋喺高陽,煲劇、煮飯仔、做愛做嘅事etc;都係時候搵啲新意。 咁當然,如果悶到好似釜山咁,行成個鐘都幾乎冇一間鋪係開的話,又另計。 由於臨時改變旅行地點,我哋喺金海機場嘅韓國觀光公社book酒店,搵到間喺濟州市嘅小酒店。落腳後,我哋決定先去西歸浦,即係濟州島嘅南端。 Chloe話要帶我去熱帶雨林,於是我哋去咗如美地植物園(여미지 식물원 )。 Courtesy: 韓國觀光公社。 「蠢蛋哥哥,」Chloe望住植物園陰陰嘴笑。「你諗緊啲乜嘢呀?」 「我唔知,」我答佢。「我淨係知你諗緊咸濕嘢。」 「咁係似吖嘛!」Chloe抗辯。「好地地起個植物園,點解要起到咁嘅樣喎……」 「弗洛伊德話呢啲叫陽具崇拜喎……」我仍然皺住眉望緊嗰座嘢。 「個比例好似唔啱咁嘅……」Chloe仍然未放棄。「應該長啲喎……」佢睄一睄我身體某部份。 「好喇金銀美,」我覺得係時候制止佢胡思亂想。「Over咗喇;我哋都係去睇植物啦。」 「咩喎,咁係吖嘛……」Chloe伸一伸脷,跟住我行入去公園。「我讚緊你喎!」 Continue reading »


當首爾仍是叫漢城的那些年(肆拾伍)

圖:Tobyhk © 1991年冬,Santa Monica,Colette屋企門口。 我同Colette,一人一副孖葉,反扣住我哋雙手。我哋面面相覷,睇住對方俾孖葉塔住個樣。Colette睇睇吓,kit一聲笑咗出嚟;然後,我都笑咗出嚟。 「虧你哋兩個仲笑得出……」Amélie(Colette媽媽)望住我哋兩個大小白痴,原本皺晒眉頭,突然間都擰擰頭笑咗出嚟。 是咁的,Colette隔離屋個阿伯,養咗隻混種狗仔;隻狗仔好鍾意鼠過Colette個花園度大小二便。原本都冇乜問題,咪當施肥囉;但係Amélie喺花園度擺咗好多陶瓷公仔,隻衰嘢就專揀啲公仔嚟當燈柱小便。同佢主人講,阿伯仲鬧返Amélie轉頭;於是Colette決定教訓佢,偷咗佢隻狗,收埋喺後院嘅屋仔。 原本都係諗住玩吓,嚇吓個老嘢,點知個老嘢報警;差人查到嚟嗰陣,隻衰嘢又吠;於是全無犯罪天份嘅我同Colette斷正,人贓並獲。 「最衰都係你個死婆,諗埋啲屎橋!」我喺警車上面鬧笨賊Colette。 「你咁叻,你又唔阻止我?!」佢反駁。 「我費事到時我俾你鬧呀!」我其實甚少鬧佢,但嗰一刻有少少火火哋。 「我坐住咗對手呀!點解個手釦咁緊㗎?」佢試圖將對手移離佢個大籮柚,但係手釦太緊人太「論盡」,結果都係坐住咗。 「你兩個收聲好唔好!」車頭個差佬頂我哋唔順。 我同Colette如言收聲,個死婆竟然仲有心情嘟嘴。過咗冇一分鐘,Colette突然伏個頭喺我膊頭上面,笑住同我講:「Babe,我哋一齊俾人拉呀,Bonnie and Clyde咁,係咪好浪漫呢?」 我忍唔住笑咗出嚟。前面個差佬喺倒後鏡見到呢幕,結果都忍唔住笑。 學校講手當日晚上,一山警察署。 冇錯,結果我又俾人塔咗返差館。英雄救美係有代價嘅,做三分鐘英雄,我而家起碼喺度踎咗幾個鐘,仲未知幾時走得;一個唔好彩,可能仲有一兩碌跟尾。 呢鑊真係為女死、為女亡、為女打入雜差房。 我望一望隻表,成八點幾。佢哋塔咗我返嚟幾個鐘,乜都冇做過,淨係帶我入咗嚟呢間疑似落口供嘅房、解咗我個手釦、擺低咗杯水,然後就唔見人。坦白講,好悶呀! 我再望一望隻表,咦?個表面玻璃裂咗。乜我攤手咁大力嘅咩?諗返轉頭,所有嘢都係因為火遮眼,其實單嘢都唔關我事。但係佢出手打Chloe,咁就成件事唔同晒:一個我錫佢都嚟唔切嘅人,你夠膽郁手?有刀的話,我手都斬埋你落嚟。 對上一次打鑊大大鑊嘅,就係為咗Colette,因為佢喺我做嘢嘅disco俾人抽水;睇嚟,我條命都係要為女人打交。 Colette講得啱,我係個好衝動嘅人。 呢個時候,有人開門,係個比較後生嘅軍裝差人,拎住一盒疑似係飯嘅嘢。 「Din……dinner……」佢有啲口窒窒。 Continue reading »


當首爾仍是叫漢城的那些年(肆拾肆)

圖:Tobyhk © 人生,係一段充滿未知之數嘅歷程;正因為呢種「未可預期」嘅特性,令到人生充滿趣味。 幾個月前,我仲係同Colette如膠似漆咁喺漢城遊歷;如今,伴隨喺我身邊嘅已經變為Chloe。地方冇變,變嘅係人。 (我老婆按:講到咁好聽,係你變心啫,衰佬!) 1998年1月中某個星期五。 「你好嘢呀你,有異性冇人性;」電話裏面傳嚟Colette嘅聲音。「有新女朋友就將我忘記得一乾二淨,等我孤零零一個人,自己食pizza同睇帶過聖誕。」 「Mademoiselle Colette,我知你已經好努力,」我好鎮定咁答。「但係扮可憐搏同情真係唔係你強項,算把啦你;我估你聖誕返咗LA陪媽媽。」 「妖!你𠱁吓我唔得嘅,係都要玩踢爆!人哋失戀你都唔讓吓我!妖!妖!」佢真係講廣東話係咁妖我㗎! 「妖!我夠失戀咯,仲係俾你個死婆飛𠻹呀!你知唔知我幾傷心幾可憐呀!All by myself. Don’t want to be, all by myself anymore…」我唱埋出嚟。 「妖!慳啲啦仆街!呢頭失戀,嗰頭就拖住個靚靚韓國小姐過聖誕啦!我返LA,仲俾媽媽問到我口啞啞,話點解你唔返嚟陪我過聖誕呀!妖!」一個鬼妹廣東話英文夾雜咁一輪嘴講嘢,其實幾cute嘅。 「咁你點答呀?」我擔心佢阿媽會拆咗我間屋。 「冇呀,話你冇時間囉,唔想解釋咁多。」佢聲線無奈;無計,嗌分手嗰個係佢,我愛莫能助。 「咁都啱嘅……」唔係咁可以點? 「你呀,識咗新女朋友,就對人好啲喇;」Colette好似我阿媽上咗身咁,喺度教訓我。「唔好仲係咁冇心肝,唔係個個都好似我咁,咁就得你㗎!」 Continue reading »


當首爾仍是叫漢城的那些年(肆拾貳)

圖:Tobyhk © Boxing Day早上。 兩日兩夜。我哋兩個由平安夜開始,兩日兩夜冇離開過宿舍,三餐都係靠之前Chloe買落俾我嘅剩餘物資渡日(同埋偷食美恩姐姐整俾Ricky嘅泡菜)。今日再唔出街、起碼入返啲糧草的話,兩個「有情飲水飽」嘅懶人,好大機會會餓死。 Chloe有兩個壞習慣,之前已經知道嘅係,佢瞓唔夠時辰的話,係叫極都唔醒嘅;呢兩日知道嘅係,佢賴床情況非常嚴重。基本上,由佢醒咗,到佢終於捨得落床,冇一粒鐘都起碼大半粒鐘。 費盡九牛二虎之力,終於成功將佢拉咗起身。佢梳洗完後,返咗入嚟換衫。 換換吓衫、只係著住內衣嘅佢,突然間好似Victoria’s Secret啲model上身咁,騷首弄姿,然後問我:「我呢套內衣靚唔靚呀?」 我細心一望,款式似曾相識。 「我知你鍾意呢款,專登為你買㗎。」佢講嗰陣指一指我上次收埋Colette個bra嘅櫃桶,有少少面紅。 「好靚,但係你點知我會有機會睇到呢?」係囉,平安夜我去搵佢嗰陣,大家都仲係曖曖昧昧兼甩甩哋咁,未成事㗎。 「有備無患嘛!乜你唔知,女仔只會喺兩個情況之下,先會買新內衣嘅咩?」佢仍然有少少面紅。 「唔知呀,咩情況呀?」乜女人買嘢需要理由嘅咩? 「嘻嘻!蠢蛋嚟㗎。女仔去買新內衣,一係著開嘅爛無可爛,一係就買嚟著俾男朋友睇。」即係咁,呢個理論,當年Erika都有同我提過,不過係我唔上心咁解啫。 男人有興趣嘅,係女人嘅身體;胸圍底褲呢啲咁形於外嘅嘢,其實都係睇完就算。當身體某部份充緊血嗰陣(我意思係個腦),去到最後咪又係除得快好世界。 「但係,你又點知,我哋會喺嗰晚……有機會睇你嘅新內衣呢?」唔好話俾我聽,你長期收埋一套喺手袋等我上釣囉。 「唔知㗎,所以約親你都著定先囉!」佢眼眨眨咁望住我。 「嗰晚我冇約你喎……」係囉,你都避開咗我好幾日啦。 「嘻嘻,如果我真係唔想俾你搵到的話,就唔會去個咁易搵嘅地方啦!」咁又係,佢是但搵個不知名漢江公園坐低,由汝矣島去到九宜江邊,我聖誕搵到佛誕都未必搵到佢。 「咁你咪要買好多套囉?」投資咁多淨係為咗俾我除,成本效益成疑但係想法好可愛,值得推舉。 「幾套咁啦,嘻嘻!」佢係咁擺post。可以睇得出,佢開始可以好自在咁喺我面前展露佢嘅身體。但係佢再繼續咁扭落去都唔係辦法,於是我行埋去攬住佢,輕聲同佢講:「不如都係轉頭先出街咯。」佢kit一聲笑咗出嚟。 轉頭,終於出咗(我意思係出咗街)。再唔出街的話,一係餓死,一係攰死。 「有冇諗過,我哋呢幾日有咩玩呀?」佢問我。 「咁你想出去玩,定係留喺高陽市?」我反問;其實我乜idea都冇。 「留喺『貓貓城』。我唔想出漢城,好多人。」Chloe口中嘅「貓貓城」即係高陽;因為高陽市(고양시 Continue reading »


當首爾仍是叫漢城的那些年(肆拾壹)

戀戰 • 서울 (合) 圖:Tobyhk © (留意返:《當首爾仍是叫漢城的那些年》係一部以廣東話母語寫嘅小說。) 仍然係平安夜,凌晨時份。 Chloe幽幽轉醒,望一望我,然後揭開小小被頭,檢視自己是否衣冠整齊。 「唔使睇喇,」我開佢玩笑。「今次真係衣冠不整喇。應該係話,乜衣冠都冇,喺晒地下。」 佢好怕醜咁笑起上嚟,然後掹個枕頭掟我。 「我要著衫呀,」佢半帶嬌羞咁講。「快啲擰轉面!」 「怕乜啫?」我繼續玩。「頭先乜都見晒啦!」 「애~~」佢嬌嗔、一邊搵被遮住自己、一邊企圖捉住我嚟打;結果打又打唔到,被又跌埋;唔知顧得打定顧得遮住自己。「你好衰㗎!佔完人便宜仲要蝦人!」 係咪每個女仔同男朋友第一次親熱之後,都會變得咁嗲嘅呢? 「唔同你玩呀,」Chloe捲住張被、企咗起身、向衣櫃方向半行半跳過緊去。 「借件衫俾我著吖!」佢行行跳跳、突然間一聲慘叫,連人帶被仆咗落地。 「에구~~嗚……痛痛……我要抱抱!」佢扁晒嘴遞起雙手,我埋去抱起佢。還好張被包住佢,應該冇受傷。 「咁你想要咩衫呀?」我問佢。「我攞俾你啦。」 「喺東大門第一次見面,同你一齊買嗰件。」佢笑得好嬌嗲。 聖誕日早上。 Chloe著住我件淺藍色恤衫周屋走。梳洗完畢,佢喺我書檯前面搽緊cream;望住佢恤衫加長腿,我連眼都唔敢眨,驚會睇少咗啲嘢咁。 究竟,女人同男裝恤衫之間,有乜嘢秘密呢?點解Chloe著住我件恤衫,會性感咗咁多嘅呢? Boyfriend Jeans唔係唔好睇,但係有得揀的話,我prefer Boyfriend Shirt。 Continue reading »


當首爾仍是叫漢城的那些年(肆拾)

戀戰 • 서울 (轉) 圖:Tobyhk © 十二月廿三日,平安夜前夕。 我搵唔到Chloe,電話冇人聽、SMS唔覆、email唔覆、ICQ冇開。邊個話通訊科技發達就唔會人間蒸發? 喺打過電話去學堂搵佢、佢同事話佢忙緊唔得閒聽電話之後,我冇再打鑼咁搵佢。其實我最主要係擔心佢嘅安全;既然佢冇事,咁我亦都估到,佢點解唔接我電話。 老老實實,我覺得Pepero應該好似煙咁,喺個盒上面有警告字句囉!「亂收異性送贈的Pepero可以致命」;再唔係索性喺個盒面印大大張結婚相,上面寫住「Pepero可引致婚姻」,我睇你哋仲有冇送/收得咁過癮! 講返轉頭,其實美恩講得啱,忍耐係有個限度嘅;我拖咗Chloe咁耐,佢心淡都好正常。與其打鑼打鼓咁搵佢、搵到之後又揸唔定主意;倒不如我冷靜一吓、問吓自己:究竟想點? 其實我唔係唔知Chloe想同我一齊;只不過,我下意識拒絕相信呢個事實。講真,我都唔知我憑乜令到一個咁好條件嘅女仔愛上我。我唔係自卑嘅人,我只不過係仲未習慣呢種被愛嘅感覺。 咁究竟我愛唔愛Chloe?愛。咁除咗美恩嘅「魔咒」之外,仲有乜嘢令我對Chloe咁猶豫? Colette。 佢係我到目前為止,唯一相愛過嘅女人。我愛咗呢個女人太耐,我仍然唔係好知,應該點放低佢。我好擔心,一旦同Chloe一齊,佢會變咗Colette嘅「愛的替身」。 解鈴還須繫鈴人,我打俾Colette;雖然我都唔明,我同第二個女人嘅嘢,關佢咩事。但係我深信,如果喺呢件事上面,仲有人可以幫到我的話,嗰個一定係佢。 「點呀你?」話筒傳嚟熟悉嘅親切聲音。「就聖誕喇喎,你唔使陪女朋友咩?」 「佢都仲未係我女朋友……」我開始將件事一五一十咁講俾佢聽。 「Alan,」Colette煞有介事咁講。「我同你相識咁耐、一齊咁耐,就算你再唔係我男朋友,我都當你親生哥哥一樣、好似家人咁愛你;」 「然後呢?」我知佢即將會燒我數簿,所以俾位佢入;冇計,我太熟佢性格。 「其實你知唔知,」佢語氣開始激動。「喺感情上面,你係一個仆街嚟㗎?」仆街兩個字,係Colette用得最多嘅廣東話;主要用喺我身上。 (題外話:呢個亦係我唔會教外國人講小你老母嘅原因 — 你教條鬼仔/妹講小你老母,你估佢第一個小嘅會係邊個嘅老母?) 「我真係好後悔,當日喺Santa Monica冇一腳伸你落海!當年你對住我係咁,而家對住第二個又係咁;你可唔可以破例一次,唔好諗咁多,瀟灑啲做人呀?你驚乜唧?人哋係女仔都未驚,你唔好咁細膽好唔好?將來嘅嘢,將來先算啦!知唔知咩叫珍惜眼前人呀?」伸我落海?你捨得咩,死婆! 「我知你諗緊乜,其實我都好掛住你。但係我哋要學識,點樣放低對方。喺你眼前呢個女仔,等咗你三個月㗎喇!你一係就同人講清楚你想點,唔好嘥人時間;一係就好好向人表白,唔好諗住要人做主動。你男人嚟㗎!做啲嘢似返個男人好唔好?勇敢少少好唔好?」佢激動到有少少索氣。 「我唔相信你會捨得放棄佢,否則你都唔會打俾我同我傾呢件事。你無非都係想我鬧醒你啫!」Colette語氣開始平復;知我者莫若佢。「好好哋諗個方法向佢示愛啦;唔好失驚無神錫人一啖囉!當日我真係好想煎你一巴!哈哈!」 「你捨得咩?」我點都要攞返個彩㗎喇。「你恨咗好耐啦!我唔錫你,你咪繼續封塵囉四眼妹!」 Continue reading »