RIP to the fallen

Photo by Nik Shuliahin on Unsplash

其實,九個月前,我開始患上情緒病。

呢種病,並唔係你哋喺電視劇睇見咁癲吓喪吓或者喊苦喊忽。其實喊得出,已經唔係最壞嘅時刻。最差嗰陣,我對身邊嘅任何事物都冇任何感覺,每日起身,第一件事會諗,就係:不如今日自殺。

幸運嘅係,我有一個關心我嘅老婆;幸運嘅係,我有個心理醫生朋友,唔使我慢慢掛號排期;幸運嘅係,我有全包嘅醫療保險,我可以幫襯我朋友而唔使擔心睇醫生睇到破產。否則,我未必仲喺度。

唔好立亂安慰你身邊疑似患上情緒病嘅朋友,唔好同佢哋講「睇開啲啦」、「唔好亂諗嘢」、「cheer up」之類嘅「正能樣」說話,能夠自我安慰嘅就唔係病。更加唔好亂咁走去「關心」情緒病患者,我最唔想見嘅就係你哋可憐我嘅目光。我最渴望,就係個病盡快好返,唔使俾人當怪物咁睇。

不過講真,就算棟喺你哋面前,你哋都未必會睇到、未必識睇。情緒病,我唔發作或者我唔出聲,冇樣睇㗎。

我好返晒未?唔知。或者咁講,冇人可以完全好返,只係睇你點樣控制病情。好返係點,我唔知。但係喺呢一刻,我心情平靜;喺呢一刻,我再冇尋死嘅念頭;咁樣算唔算好返?

RIP to the fallen;我明白你。

寫。 │ 粵文, English, 한국어, Deutsch.