都是我們的日子

都是我們的日子

當首爾仍是叫漢城的那些年(伍拾)

圖:Tobyhk © 你哋同最親密嘅人之間,係點樣互相稱呼對方㗎?撇開黃子華嘅「BB、豬豬」笑話,我相信,每一對情侶之間,都有佢哋最個人、最私密嘅稱呼。 我同Chloe嘅情緣始自一句「蠢蛋」。最初係佢叫我蠢蛋,然後我禮尚往來,叫返佢做蠢蛋。「바보 」(Papo)一詞喺韓文嘅應用係好廣泛嘅,既可以係情侶之間嘅暱稱,亦可以係開拖之前嘅最後對話;視乎你點用,同用咩語氣講。 「蠢蛋」以外,我哋仲發展咗好多名花出嚟。但係無論我哋將對方嘅花名,改到天花龍鳳都好,喺我哋心目中,真真正正嘅甜蜜回憶、我哋真真正正互相承認嘅稱呼,都係「蠢蛋」。 그래서 넌 내 사랑 바보고. 復活節假期前夕,大韓航空KE603往香港航班。 「百厭公主,」我遞份入境表俾Chloe。「填咗份入境表啦,有冇筆?」 「係百濟公主呀蠢蛋,」Chloe接過入境表,拎筆出嚟填。「點解公主入境都要填表喎?」 「咁你百濟俾人亡咗國嘛,」唔知點解,我開始學識陪佢癲。「到你第時復國咪唔使填表,仲有紅地氈同儀仗隊歡迎你𠻹呀。」 「咁好啦。」佢低頭填表;有時我懷疑,究竟佢係真黐定假傻。 喺韓國,復活節係冇公眾假期嘅,但我學校係基督教學校,所以有一個星期學校假。Chloe原本都係冇假期,但係呢條女為咗「溫仔」,死度爛度,俾佢度到一個星期假。 於是我哋決定嚟個一星期香港、上海之旅。 同日下午,港島區某住宅。 「Ms Kim, have some tea, make yourself Continue reading »


悼六四

Photo courtesy: Rare Historical Photos 我的立場,很簡單。只要在我有生之年,那怕只是每年一幅圖,我都會堅持悼念六四。 那怕只是一幅圖;那怕只是一句話;那怕只有我一個; 我都會堅持悼念六四。


亂緒

Photo by Tommaso Pecchioli on Unsplash 呢篇嘢主要係記載,我呢段時間腦海裏面嘅一堆雜亂無章嘅思緒。一如以往,毫無養份。如果你係嗰啲,睇人寫嘢要有得著嘅實用人士,請回。 (心底嗰句:睇嘢要有得著就去買書睇啦,cheap喱!又要有得著,又唔捨得俾錢,你當啲作者個個都識光合作用,唔撚使食飯嘅咩;你老味!) 差唔多一個月嘅時間,我完全冇寫作嘅意欲。對住《漢城》個結局,完全唔滿意,但乜都做唔到;總之就係唔想寫。 其實寫咗咁多年嘢,呢啲場面司空見慣。但係話分兩頭,成個月都冇心機寫嘢,又真係非常少有。 喺呢度睇咗幾篇,啲所謂writer教人點樣突破writer’s block嘅英文文章,對「寫作便秘」當然冇幫助;但係對「鳩噏當秘笈」呢五隻字就有啲新體會。 有篇嘢,個「作家」教人無論如何,每日都要坐低寫嘢 — 寫乜都好,總之每日都要寫啲嘢。咁樣寫寫吓,你就會每日有嘢寫,於是就唔會有writer’s block。 我心諗:你都黐撚線嘅!都話明寫唔出咯,我仲坐喺張書檯面前托咩!你會唔會叫個不舉嘅人,每日對住套AV choke半個鐘吖?如果每日係唔係都choke半個鐘就可以治陽痿,咁Pfizer執撚咗九年啦!仲邊使偉哥喎!手攰咪買支正骨水囉! 更大嘅問題係,呢啲咁嘅濕鳩文章,閒閒哋有一兩千claps!即係話,有為數唔少嘅人,真係以為每日對住三上悠亞choke半個鐘就可以治陽痿!咁我寧願信食砵仔糕治陽痿喇!起碼有嘢落肚先啦! 如果寫嘢有得迫,有得「無論如何」都要寫的話,呢個世界仲有窮人咩!我就真係未見過,迫自己寫出嚟嘅文章,會有好嘢囉。 冇幾耐之前,寫咗篇關於音樂嘅嘢,嗰陣仲大言不慚,話買咗支classical尼龍弦結他之後,唔會咁快買acoustic鋼弦結他;言尤在耳: 支Ibanez其實唔係好貴;我從來未買過貴嘅acoustic結他,之前喺韓國嗰支,都係本土品牌平嘢。呢支係我第一支全mahogany嘅acoustic,送貨嗰日,tune好音就急不及待一試,發覺真係唔同啲。 一分錢、一分貨;我開始明白,點解會有人花八九千歐元買一支結他。 買咗一星期,我手指頭上厚厚嘅繭又返咗嚟喇。曾幾何時,呢啲繭代表咗一種痛,同埋一種成就;而家,呢啲繭變咗一種甜蜜,一個十幾廿年冇見嘅老朋友重臨嘅甜美回憶。 原來,我對結他,都有種不能言喻嘅迷戀。 講開韓國,Colette上星期一家大細去韓國玩咗一個星期。一家大細去玩,輪流病是常識吧!佢個細仔喺韓國一落地就病,然後臨走前到個大仔。返到美國,輪到佢兩公婆病;好彩都係傷風感冒呢啲小病。 佢哋今次去韓國,全程係美恩姐姐招呼。我問佢,咁多年冇去,有冇乜嘢特別好玩?佢有少少疑惑咁答我: 「我個仔,好似鍾意咗美恩個女……」 我幾乎笑到收唔到聲。 Continue reading »


當首爾仍是叫漢城的那些年(肆拾玖)

圖:Tobyhk © 點解情侶要同居呢?其實呢個問題,你問一百對情侶,會有一百二十個答案。無論你得到嘅答案,係幾咁冠冕堂皇,實際喺背後嘅真正答案,只係得一個: 方便搞嘢。 我同Chloe,一直都冇呢個問題。因為我哋從day 1開始,就已經有完善嘅硬件配套。我指嘅硬件係我宿舍間房,唔係我身體上嘅「硬件」。 咁究竟點解我哋要同居呢? 如果你問Chloe的話,佢會答你:「咁我可以日日見住我男朋友囉。」事實上,佢真係咁答我。 如果你問我的話,我會答:「唔知。」唔好誤會,我個答案冇貶義,只不過真係唔知。我女朋友提出同居,我同意,咁咪同居囉。 第一個係咁,第二個又係咁。往後嘅日子證實,每一個都係咁;拍拖,之後同居,命中率高達九成。 星期六,凌晨三點。 我俾一個鞭捶打醒咗。出招嘅,當然係Chloe。 今晚係我哋第二晚同居,同琴晚一樣,基本上係一場男女子混合散打。Chloe嘅招式,係介乎大聖劈掛同蔡李佛之間,都係長橋大馬大掛手,一嘢車過嚟嗰隻。而我,為咗憐香惜玉,只能硬食。 之前喺高陽,因為張床細,我哋都係要攬住瞓,有一種制約效果;最差都只不過係俾佢隻脾拑住條腰。而家,我哋有張king size雙人床,空間多咗,點知先出事;全程自由搏擊。 點解佢會咁反瞓㗎! 結果,我都係要攬住佢瞓;我擒住佢,總好過俾佢打到黐肺。唔知點解,當佢意識到有人攬住佢瞓嗰陣,就會靜落嚟,轉便都少咗。 愛惜生命,我要開始習慣,長期攬住佢瞓。 星期六,早上九點。 「叮噹」。門鐘響起,喺廚房煲緊咖啡嘅Chloe去開門。 「早晨,金太太。」耳伴傳嚟一把老人聲音,應該係住喺樓上嘅包租公崔先生。 「崔先生早晨。」Chloe嘅答禮證實我冇估錯。 「金太太,呢張係租金嘅收據,多謝你。」崔先生好客氣咁同Chloe講。「呢度仲有少少泡菜,係我老婆醃嘅,小小意思。」 「崔先生你太客氣喇,多謝!」 「咁我走先啦,金太太;再見。」 「再見!」 Continue reading »


If We Were Destined

《和遊記》 中,比主線更浪漫嘅愛情故事。 牛魔王與羅剎女。 韓劇《和遊記》(화유기 ;天下第一恩主民族夾硬改人哋做《花遊記》)我諗好多人都睇過;未睇的話,其實要簡介呢套劇都好簡單:係一個關於孫悟空點樣溝咗兼扑埋唐三藏嘅故事。 差啲唔記得講,上面嗰段含劇透喎;下面嗰啲都係。 其實都唔算劇透吖,要睇嘅睇咗啦;未睇嘅你都唔諗住睇㗎啦,係咪? 坦白講,劇中嘅主線劇情其實唔太吸引,因為女主角陳善美(三藏)係一個冇人緣冇朋友冇戀人嘅宅女,呢個設定令飾演陳善美嘅吳漣序嘅可愛扮cute本錢無處發揮。再加上飾演悟空嘅李昇基外表唔係咁討好(佢唱歌幾ok,但呢樣係另一回事),劇本又有爛尾嘅跡象,所以吸引力大減。 主線失色,造就咗副線嘅突出;呢條副線叫牛魔王與羅剎女(鐵扇公主)。 突出嘅原因之一,係選角。年齡微近五張嘅車勝元係史上最型棍嘅牛魔王,沒有之一。再加上女人味滿到瀉嘅金志秀客串演出羅剎女,戲份雖然唔多,但係每次出場都有種令人心疼嘅憂怨。大概呢個世界上,冇嘢俾一個含住兩泡眼淚嘅韓國女人,更能令人揪心;不論年齡。 突出嘅原因之二,係劇本設定。已經轉世咗成千年嘅牛魔皇現世係某娛樂集團嘅老闆,再加上因為遭天譴而要輪迴108次、仲要每次都喪夫失子嘅羅剎女。淨係呢個設定,已經係無敵。 「輪迴108次、仲要每次都喪夫失子」;有咗呢個設定之後,試問《藍色生死戀》仲唔係喜劇係咩? 終於,牛魔王喺睇完羅剎女嘅第八次輪迴之後,喺Evo 9期間(即係現世)決定幫佢頂埋餘下嘅99次(頂嘅方式大約係俾流星好似機槍咁掃射;都話呢套嘢爛尾味道濃郁㗎啦)。羅剎女喺擺脫輪迴之苦後,轉世為花,帶領牛魔王去搵佢哋同樣係轉世嘅仔、喺三神婆婆(保護細路嘅神)嘅雜貨店做打雜嘅電玩宅男紅孩兒。 除咗呢套之外,十五年冇睇韓劇嘅我,最近一口氣新新舊舊睇咗五套韓劇(《鬼怪》、《Misty》、《來自星星的你》、《經常請吃飯的漂亮姐姐》、《最佳愛情》);睇完之後嘅唯一感覺,就係港劇可以正式收皮。 唔係講笑,廿年前,睇韓劇係酷刑,好多韓劇連韓國人都頂唔順,寧願去租港劇睇。廿年後,韓劇嘅進步,可以將港劇風光大葬。乜都唔講,香港/中國拍咗咁多年《西遊記》,個個都黐執毛扮馬騮,有邊個可以扭到條好似《和遊記》咁嘅橋出嚟? 就當你扭到條橋出嚟,電視台肯/敢拍咩?咪又係睇住上面班恩主嘅面色做人。 最近十年八載,你哋覺得真係好好睇、好正嘅港劇有幾多套?又諗住同我講《天與地》、《選戰》、《瑪嘉烈與大衛系列》?你唔覺唚我都悶啦!就當呢三套真係好劇,十年得三部好劇,你都仲當港劇係好嘢,你對「好嘢」嘅定義,都好脫俗吓囉。 邊個打邊個自己識分啦。連劇都有premium出仲要出得咁cute呀,你話港劇想唔收皮都難。 TVN製作嘅韓劇,一般都會每一條感情線、度身訂造一首主題曲;呢招喺《鬼怪》(쓸쓸하고 찬란하神 — 도깨비 )呢套劇中尤其突出。《和遊記》亦都唔例外,下面個MTV嗰首《If We Were Destined》就係牛魔王同羅剎女嘅主題曲。 坦白講,歌詞一般,太過白;但係旋律都尚算優美,벤 Continue reading »


當首爾仍是叫漢城的那些年(肆拾捌)

Chloe의童夢이루어집니다 圖:Tobyhk © 喺一段正常嘅感情生活入面,理論上,我哋每日無時無刻,都係愛緊同一個人。所以理論上,應該日日都係情人節。 好地地咁咪幾好囉,偏偏我哋又要阿茂整餅,走去揀一日做「情人節」。咁即係點呀?我明明日日都已經愛緊你,點解喺每年情人節,我又要對你表示「我愛你」?咁我喺呢日愛你,其餘嗰364日係咪唔使愛你? 媽,我好亂呀! 平日五百(港幣;下同)一打玫瑰,情人節賣兩千。平日五百一餐燭光晚餐,情人節兩千。好明顯,情人節並唔係向荷包同銀行戶口示愛嘅日子。 人類都係喜歡作繭自縛。 (條副題我係玩緊嘢,真正韓文唔會咁寫,應該係「Chloe의 어린 시절 꿈이 이루어집니다. 」;寫返出嚟費事俾人叉輪廚。) 1998年2月14日,星期六,情人節;係我同Chloe嘅第一個情人節。 呢個亦係Chloe咁大個女,第一個有男朋友嘅情人節;今次第二次拍拖嘅佢,之前嗰段關係,等唔到呢一日。 如果以女仔平均由十二歲開始,就夢想有個完美嘅情人節嚟計,廿二歲嘅Chloe,發呢個夢發咗十年。今年,1998年,佢終於「叫糊」。而佢嘅Valentine,就係我:起晒躲嘅「Heartless little shit」。 如果,呢次我搞「喎」咗Chloe個情人節,亦即係話,我親手摧毀咗一個少女嘅十年夢想。 God save Chloe Kim。 早上八點,跑步時間。 原本係五點半嘅,但自從Chloe週末入嚟過夜之後,我就冇可能五點半起到身。因為佢瞓覺嗰陣,鍾意用佢嗰42吋拑住我條腰同下盤,我動彈不得,只能夠趁佢轉便先可以甩身。 Continue reading »


當首爾仍是叫漢城的那些年(肆拾柒)

圖:Tobyhk © 不經不覺,由學堂重遇到而家,我同Chloe已經認識咗四個幾月。喺呢漫長嘅四個幾月裏面,無論我哋嘅關係,係朋友定係情侶,我哋都花咗好多時間喺對方身上。 從中秋節開始,我哋平均每星期見面三四次,往後嘅日子繼續增加;直到開始拍拖後呢個零月,我哋已經差唔多日日見面。按照呢個進展,我同Chloe同居,只不過係時間問題。 當年我同Colette都係咁。 只不過,對於韓國呢個國家,我仍然非常陌生;只係知道佢比香港保守。我實在唔清楚,我同Chloe喺呢個咁嘅社會環境之下,究竟同居係咪一個可行嘅方案。 更何況,我其實唔係100%肯定,我有足夠心理準備,開展另一段同居關係。(留意返:係唔夠心理準備,唔係冇。) 一二月天時去濟州,其實係個唔錯嘅時間。喺漢城,呢啲月份通常都係凍到唔想出街嘅月份;濟州就唔同,睇天氣預測,日間起碼有十度八度。對香港人嚟講,十度八度都仲係好凍;但對於漢城居民(即係我呢個漢城居民),十度八度係好舒適嘅氣溫。 一月尾,農曆新年。濟州島,西歸浦(서귀포 /Seogwipo)。 農曆年,成個星期假,我同Chloe決定去濟州旅行。其實最初我哋嘅選擇係釜山,但係去咗一日之後,發覺釜山過年悶到發慌,所以臨時決定轉地頭;改去濟州玩。 其實去邊度玩,我哋都冇乜所謂,只係想行開吓。成日喱埋喺高陽,煲劇、煮飯仔、做愛做嘅事etc;都係時候搵啲新意。 咁當然,如果悶到好似釜山咁,行成個鐘都幾乎冇一間鋪係開的話,又另計。 由於臨時改變旅行地點,我哋喺金海機場嘅韓國觀光公社book酒店,搵到間喺濟州市嘅小酒店。落腳後,我哋決定先去西歸浦,即係濟州島嘅南端。 Chloe話要帶我去熱帶雨林,於是我哋去咗如美地植物園(여미지 식물원 )。 Courtesy: 韓國觀光公社。 「蠢蛋哥哥,」Chloe望住植物園陰陰嘴笑。「你諗緊啲乜嘢呀?」 「我唔知,」我答佢。「我淨係知你諗緊咸濕嘢。」 「咁係似吖嘛!」Chloe抗辯。「好地地起個植物園,點解要起到咁嘅樣喎……」 「弗洛伊德話呢啲叫陽具崇拜喎……」我仍然皺住眉望緊嗰座嘢。 「個比例好似唔啱咁嘅……」Chloe仍然未放棄。「應該長啲喎……」佢睄一睄我身體某部份。 「好喇金銀美,」我覺得係時候制止佢胡思亂想。「Over咗喇;我哋都係去睇植物啦。」 「咩喎,咁係吖嘛……」Chloe伸一伸脷,跟住我行入去公園。「我讚緊你喎!」 Continue reading »


當首爾仍是叫漢城的那些年(肆拾陸)

圖:Tobyhk © Our smile doesn’t mask our sorrow,and goodness needs no sacrifice.The pity we give to nonloversis even more than they deserve. 星期六早上,狎鷗亭洞,Chloe屋企樓下。 萬般帶不走,唯有鑊隨身。 我打俾Chloe,話佢聽我喺佢樓下,叫佢落嚟;係時候拆第一隻鑊。 Chloe琴晚嘅說話,我係理解嘅,我完全感受到佢嘅低落同氣餒。只不過,如果因為咁,而要同我分手、讓返我俾Colette,呢個完全唔似係佢嘅所為。再加上佢嘅passive-aggressive性格,我覺得,其實佢係唔開心,有少少情緒發作,先至會咁講。 Continue reading »


當首爾仍是叫漢城的那些年(肆拾伍)

圖:Tobyhk © 1991年冬,Santa Monica,Colette屋企門口。 我同Colette,一人一副孖葉,反扣住我哋雙手。我哋面面相覷,睇住對方俾孖葉塔住個樣。Colette睇睇吓,kit一聲笑咗出嚟;然後,我都笑咗出嚟。 「虧你哋兩個仲笑得出……」Amélie(Colette媽媽)望住我哋兩個大小白痴,原本皺晒眉頭,突然間都擰擰頭笑咗出嚟。 是咁的,Colette隔離屋個阿伯,養咗隻混種狗仔;隻狗仔好鍾意鼠過Colette個花園度大小二便。原本都冇乜問題,咪當施肥囉;但係Amélie喺花園度擺咗好多陶瓷公仔,隻衰嘢就專揀啲公仔嚟當燈柱小便。同佢主人講,阿伯仲鬧返Amélie轉頭;於是Colette決定教訓佢,偷咗佢隻狗,收埋喺後院嘅屋仔。 原本都係諗住玩吓,嚇吓個老嘢,點知個老嘢報警;差人查到嚟嗰陣,隻衰嘢又吠;於是全無犯罪天份嘅我同Colette斷正,人贓並獲。 「最衰都係你個死婆,諗埋啲屎橋!」我喺警車上面鬧笨賊Colette。 「你咁叻,你又唔阻止我?!」佢反駁。 「我費事到時我俾你鬧呀!」我其實甚少鬧佢,但嗰一刻有少少火火哋。 「我坐住咗對手呀!點解個手釦咁緊㗎?」佢試圖將對手移離佢個大籮柚,但係手釦太緊人太「論盡」,結果都係坐住咗。 「你兩個收聲好唔好!」車頭個差佬頂我哋唔順。 我同Colette如言收聲,個死婆竟然仲有心情嘟嘴。過咗冇一分鐘,Colette突然伏個頭喺我膊頭上面,笑住同我講:「Babe,我哋一齊俾人拉呀,Bonnie and Clyde咁,係咪好浪漫呢?」 我忍唔住笑咗出嚟。前面個差佬喺倒後鏡見到呢幕,結果都忍唔住笑。 學校講手當日晚上,一山警察署。 冇錯,結果我又俾人塔咗返差館。英雄救美係有代價嘅,做三分鐘英雄,我而家起碼喺度踎咗幾個鐘,仲未知幾時走得;一個唔好彩,可能仲有一兩碌跟尾。 呢鑊真係為女死、為女亡、為女打入雜差房。 我望一望隻表,成八點幾。佢哋塔咗我返嚟幾個鐘,乜都冇做過,淨係帶我入咗嚟呢間疑似落口供嘅房、解咗我個手釦、擺低咗杯水,然後就唔見人。坦白講,好悶呀! 我再望一望隻表,咦?個表面玻璃裂咗。乜我攤手咁大力嘅咩?諗返轉頭,所有嘢都係因為火遮眼,其實單嘢都唔關我事。但係佢出手打Chloe,咁就成件事唔同晒:一個我錫佢都嚟唔切嘅人,你夠膽郁手?有刀的話,我手都斬埋你落嚟。 對上一次打鑊大大鑊嘅,就係為咗Colette,因為佢喺我做嘢嘅disco俾人抽水;睇嚟,我條命都係要為女人打交。 Colette講得啱,我係個好衝動嘅人。 呢個時候,有人開門,係個比較後生嘅軍裝差人,拎住一盒疑似係飯嘅嘢。 「Din……dinner……」佢有啲口窒窒。 Continue reading »


當首爾仍是叫漢城的那些年(肆拾肆)

圖:Tobyhk © 人生,係一段充滿未知之數嘅歷程;正因為呢種「未可預期」嘅特性,令到人生充滿趣味。 幾個月前,我仲係同Colette如膠似漆咁喺漢城遊歷;如今,伴隨喺我身邊嘅已經變為Chloe。地方冇變,變嘅係人。 (我老婆按:講到咁好聽,係你變心啫,衰佬!) 1998年1月中某個星期五。 「你好嘢呀你,有異性冇人性;」電話裏面傳嚟Colette嘅聲音。「有新女朋友就將我忘記得一乾二淨,等我孤零零一個人,自己食pizza同睇帶過聖誕。」 「Mademoiselle Colette,我知你已經好努力,」我好鎮定咁答。「但係扮可憐搏同情真係唔係你強項,算把啦你;我估你聖誕返咗LA陪媽媽。」 「妖!你𠱁吓我唔得嘅,係都要玩踢爆!人哋失戀你都唔讓吓我!妖!妖!」佢真係講廣東話係咁妖我㗎! 「妖!我夠失戀咯,仲係俾你個死婆飛𠻹呀!你知唔知我幾傷心幾可憐呀!All by myself. Don’t want to be, all by myself anymore…」我唱埋出嚟。 「妖!慳啲啦仆街!呢頭失戀,嗰頭就拖住個靚靚韓國小姐過聖誕啦!我返LA,仲俾媽媽問到我口啞啞,話點解你唔返嚟陪我過聖誕呀!妖!」一個鬼妹廣東話英文夾雜咁一輪嘴講嘢,其實幾cute嘅。 「咁你點答呀?」我擔心佢阿媽會拆咗我間屋。 「冇呀,話你冇時間囉,唔想解釋咁多。」佢聲線無奈;無計,嗌分手嗰個係佢,我愛莫能助。 「咁都啱嘅……」唔係咁可以點? 「你呀,識咗新女朋友,就對人好啲喇;」Colette好似我阿媽上咗身咁,喺度教訓我。「唔好仲係咁冇心肝,唔係個個都好似我咁,咁就得你㗎!」 Continue reading »