Blog嘢

從Xanga到Medium,我的失敗歷程。

Photo by rawpixel.com on Unsplash

先講個爛笑話。

是咁的,喺某年某月,我幫某商會,喺一個海港得一個嘅商場搞咗個launch event。當日event嘅其中一個環節叫「Blog Blog齋」;顧名思義,係請咗班blogger分享blogging心得嘅環節。

喺寫MC稿嗰陣,同事們已經盡量避重就輕,唔將個「blog」字同個「扑」字扯埋一齊。Event當日,個女MC介紹呢個環節嗰陣,佢第一句就同我爆肚直出:

「跟住落嚟呢個環節叫做『Blog Blog齋』,唔係扑嘢個扑喎!」

佢講完後,我從來未見過呢個商場,可以靜成咁;之前一晚凌晨一點set場嗰陣都冇咁靜。


鳩噏完畢;入正題。

作為一個揸筆搵食十八年嘅old seafood,咁多年嚟,我唔係冇諗過,自己寫啲嘢,然後一夜成名,以後唔使寫啲自己唔想寫嘅嘢,專寫啲自己鍾意寫嘅嘢。然後稿費源源不絕,我就炒吓股、攬吓女、撚吓雀(或者俾啲女撚吓雀)、舒舒服服咁過埋下半世。

每當諗到「自己寫啲嘢,然後一夜成名」呢個位,真係興奮到瞓唔著。然後我真係瞓唔著,因為醒起仲有兩隻稿到期未交;我可以選擇通頂寫起佢,或者通頂睇Job Market搵過份工;點都好,都係冇得瞓。

一夜成名,仲難聽過粗口。

最初接觸Blogging,係2004年,我開咗個Xanga。開呢個Xanga嘅原因,同想寫嘢成名完全無關。當年我寫blog嘅原因,係因為正值人生嘅一個災難期;我同一個識咗唔夠一年嘅女人閃婚,然後閃離婚。由簽紙結婚到簽分居協議,前後啱啱半年。

情感的風光 
無限人在看 
難到處細訴只好說謊

喺香港,呢啲私人嘢你唔會同同事講,因為你一講,好快就連公司memo都會寫埋出嚟。我喺香港冇乜知己(冇乜,唔係冇),亦唔想晚晚攬住個長途電話煩Colette;寫blog係唯一舒發途徑。

當年我眼中嘅Xanga,係一個𡃁仔𡃁妹同MK精嘅集中營。琳瑯滿目嘅glittering橫幅開版圖、marquee走字、midi甚至mp3直接播放,彷彿瞬間進入咗一個coding世界;裏面仲有好多html教學blog,教你點樣hack Xanga個settings去整上述嘅coding effect。

除此之外,我喺Xanga,基本上係自己寫嘢俾自己睇;喺一堆寫緊火星文同「誰在悼念快將接近成年 誰告戒我課室不要睡眠」嘅𡃁仔𡃁妹當中,又邊會有人有興趣睇一個三十出頭嘅失婚麻甩佬寫嘢?「卅歲仲學人失戀?乜卅歲仲未更年期咩?」

唔係講笑,當年曾經有條死𡃁妹留言俾我,話:「卅歲人,就算你仲識硬都microsoft啦!」我心諗:𡃁妹,俾心機做人啦!卅歲人,你條仔派兩次報紙,我都仲屹立不倒呀!

05年,喺荷蘭做嘢兼自我放逐嘅我,再次「唔信邪」,再開過個Xanga。今次寫時裝,仲懶有型叫咗個blog做「Haute Couture Detritus」,用我穿梭各fashion house「辦房」影低嘅剩餘物資嚟寫文。結果?我個counter好似過唔到雙位數,我就放棄咗。

用中文寫Haute Couture,首先你要問吓自己,究竟幾多中文人識讀「Haute Couture」呢個詞先。

直到07年,我入咗間美資IT公關公司做中層。我有個同事,係寫blog嘅高手。佢將職場發生嘅事,寫咗做實況小說,我都有追開;但後來俾老細知道,拉人封艇;實屬不幸。

從佢個blog ring開始,我接觸到一啲我鍾意睇嘅blogger — 渣估嘅《追揸沽》、CK嘅《人在中環》、Elaine嘅《空姐的行李篋》(呢個做埋朋友)等等。睇見人哋寫得咁好,我自然又心癢癢;於是,我開咗個Wordpress。

WordPress係一個令你好容易有錯覺、以為自己會成為成功blogger嘅地方。

對比Xanga,Wordpress喺各方面嘅自由度都比較大。有海量嘅版面設計俾你去用,再唔係自己度身設計一個又得;大量嘅widgets、plugins、SEO工具、圖片播放工具、social media連結工具等等,令到你覺得,今次天時、地利、人和俱備,仲唔紅等幾時?

特別係SEO工具。對於一般人嚟講,Google嘅世界係神秘嘅。每個人都識點樣去Google搵女神J圖搵fappening搵J Law飛機圖,但係冇乜人知道,究竟Google點樣將啲網站排名。直接啲講,就係點樣令自己個blog,喺Google排頭位。

喺Wordpress嘅plugins堆裏面,「All in One SEO Pack」就好似Natalie Portman扮緊Jackie Kennedy咁,優雅地坐在一角、悄悄地等待你嘅發現。

All in One SEO Pack嘅美麗在於,佢好簡單咁幫你處理咗一啲,你原本唔係好識嘅嘢。XML sitemap、META tags、Google Analytics、Google AMP、META keywords等等,一堆你俾我拋完都未必100%了解嘅嘢。

All in One SEO Pack就好似孔劉同你講:「溝韓妹一啲都唔難吖!你睇吓我!」然後,你開始相信,係喎,真係好似好得喎!等我試吓先!你開始忘記,你同孔劉之間嘅各項差距。你開始忘記,人哋係「國民老公」,你係「國際毒撚」。

最後,你喺個你個wordpress blog度,安裝個Alexa嘅counter;大功告成。你開始隱約感覺到,成名嘅壓力。

然後,你開始努力寫blog;
然後,你每日check你個Alexa ranking;由每日一兩次,到每日十九幾次;
然後,你發覺你個blog嘅traffic,全部都來自自己,同埋你個IT同事。因為佢個server log成日見到你上同一個網,佢諗住同老細「隊」你返工時間做私人嘢;
然後,你發覺,Google唔係睇你唔起,係睇你唔到;
然後,你發覺,搞咁大壇大龍鳳,結果都係自己寫嘢俾自己睇;
然後,你開始考慮,係咪要delete咗個Akismet,因為佢幫你截咗好幾個spam message,「spam其實都算traffic嘅一種喎」;

然後,就再沒然後。

後來,到我自己出嚟搞公關公司;其中一壇專做SEO嘅嘢,我個拍檔,係科班出身、真正嘅SEO高手。佢同我講,All in One SEO Pack嘅作用,就等於你報名參加渣馬一樣。

即係點?即係你唔報,就一定冇份跑;你報,唔代表你會嬴渣馬。個app係幫你做好咗一啲,唔係個個都識做嘅基本嘢。你做咗之後,Google隻crawler終於知道你喺乜水;但唔代表你嘅排名會高咗。就算你嘅排名真係高咗,只因為你砌低咗一班,連All in One SEO Pack都唔識用嘅人。

All in One SEO Pack喺SEO嘅世界裏面,係「小學雞」工具。

我拍檔仲幫我setup咗兩個公司blog,一個Wordpress一個Blogger。我開始寫有關PR、Marketing、social media、SEO、SMO、KPI之類嘅嘢,佢開始幫我喺背後發功搞SEO。經佢出手,我開始喺Google見到自己嘅文章,喺第一頁出現。我個blog,開始有人睇;我嘅Alexa ranking開始高。

然後,我開始要扮一個KOL,做KOL要做嘅嘢 — 屌人。我屌新浪微博(唯一非常樂意屌嘅嘢)、我屌Facebook、我屌其他行家、我屌啲唔生銹嘅丐幫blogger、我屌客。喺香港,屌人係成名嘅捷徑;總之屌得就屌唔屌得都屌,我屌故我在。

你哋而家睇我喺一個段落裏面,寫多幾個屌字都唔順眼啦,難為我當年日日做。

然後,就係大量嘅客戶「產品試用」、「開箱文」、「乜乜神祕約會」、「物物獨家試食」諸如此類;我開始Google「文妓」呢個詞點解。然後喺一篇「大榴槤」嘅「你是文妓嗎?看到第三條我就悲哭了」文章中,我對比自身,發覺十樣中咗七八樣。(講故啫,仲未折墮到要睇大榴槤)

終於,我又還原基本步 — 靠寫啲自己唔想寫嘅嘢搵食。

快到終點 才能知道 又再回到起點 重頭上路


半年前,一個偶然嘅機會,一篇Facebook嘅文章,將我帶到嚟Medium。

你哋而家就一個星期三幾次,睇我喺呢度發噏瘋;你哋見唔到嘅我,其實係個有閱讀癖嘅人。過去十幾廿年,我平均每星期閒閒哋睇幾萬字,可能更多。

最初嚟到Medium,我好似發現新大陸。呢度啲文,睇極都睇唔完。

為咗睇文,我決定俾錢做member。講真,每個月五蚊美金,我一日都唔止睇佢五蚊嘢啦!

2017年11月,係我人生嘅最低點。自9月開始,一連串綿延幾個月嘅頑疾,再加上其他事情嘅沉重打擊,我開始喺呢度,寫咗《寫字》同《生老病死》兩個系列。

有細心嘅讀者發現,點解《生老病死》冇咗最後一篇嘅?

我唔想喺度嚇大家,當時嘅我認為,《寫字》同《生老病死》,會係我嘅遺書;因為我覺得,我冇辦法再撐落去。

《生老病死》嘅最後一篇,我唔死你哋都唔會睇到。

衰嘢講到呢度為止,我仲生勾勾寫緊呢篇嘢,即係證明我呢副賤骨頭仲未死得住,你哋仲有排捱我啲廢文。

然後,12月,我開始咗《漢城》系列。寫咗咁多年,終於叫做有啲自己鍾意寫嘅嘢,同時亦都得到別人嘅認同。

其實,一切都多得兩個人。

第一個係 李飛步,佢嘅一篇華文作者集,令我浮咗上水面:

https://verbalflystep.com/list-v1-2-6f60620abe08

說來慚愧,我從來未親口向李先生多謝過佢嘅介紹。

第二個就係 史兄。我同佢原本唔認識嘅,佢亦冇俾錢我;所以我冇必要,喺呢度擦佢鞋。但係,冇史兄嘅介紹,根本就唔會有我。

https://verbalflystep.com/list-v1-2-6f60620abe08

點解我會咁講?直到目前(22/4)為止,我喺Medium有730個follower,有超過500個以上,係因為史兄篇介紹文而來嘅;你哋話,冇佢,又點會有我?講完。

另外一個我鍾意Medium嘅原因,係因為佢恰到好處嘅Algorithm,既能令我睇到,一啲我有興趣嘅話題文章之餘,亦保留到my network嘅文章;唔會好似Facebook咁,連自己朋友嘅status都睇唔到,淨係睇廣告同content farm文章。

咁當然,有錢收亦都係Medium一個吸引嘅因素。冇錯,你唔會因為想賺錢而喺呢度寫嘢;但係,每個月一百幾十美金嘅收入,對於好似我呢類「新手」作者,的確又係好好嘅鼓勵。

亦因為Medium有social media嘅成份,作者們自己能夠組成到,一個網絡作者群,互相關注到大家嘅新文章。所以,我哋呢班small potato,可以喺呢度,盡情享受粉紅色、粉藍色、粉黃色、甚至任何顏色嘅泡泡,繼續我手寫我心,睇到你哋嘔白色泡泡為止。


差啲唔記得同大家單聲:呢篇嘢成三千五百字;長文慎入。

https://like.co/herrfunghttps://verbalflystep.com/list-v1-2-6f60620abe08
https://verbalflystep.com/list-v1-2-6f60620abe08