點解又係布拉格?

有朋友問,點解我哋去親旅行,唔係布拉格就維也納?歐洲咁多地方,你兩個去晒喇?

七孔流血還七孔流血,死還死,兩樣嘢嚟嘅。歐洲的確係好多地方去,但係去新地方,同翻兜去過嘅地方,兩樣嘢嚟嘅。我唔需要去晒所有地方先翻兜。

事實上,好多時,我哋就係唔想去新地方。

細個去旅行,覺得個世界好大,次次都要去唔同嘅地方。孭住個90L嘅背囊縱橫四海、去到當地仲要喺hostel執房換床租、早餐執埋午餐要食嘅麵飽、去邊都係行路去。除咗晚餐件pizza,真係可以一日唔使錢。

自從由韓國回流香港之後,我對呢類甚麼體驗之旅已經失去興趣。去旅行,最好乜都唔使諗乜都唔使煩,住靚酒店食靚嘢睇靚嘢,有時甚至包架酒店車四圍去。我只係想行開吓、透吓氣,離地定貼地,who fucking cares?

地方冇變、人冇變,係心態變。

於是,近十年八載喺中歐,有齊上述優點而我又睇得上眼嘅,得返布拉格同維也納。

首先,呢兩個地方,距離Regensburg好近。三四個鐘嘅巴士車程、六七十歐二人來回票價、一百歐一晚嘅酒店,係非常理想嘅日常度假點;等於香港人去澳門泰國同台灣一樣。

由於我哋住嘅係suburb,如非必要(如Berchtesgaden呢類人間仙境),否則我哋唔會去一啲鄉郊地區。又由於Regensburg以至拜仁境內大部份城市,都係「佛系城市」,即係乜柒都冇,你要等緣份到等運到。所以好多時外遊,亦都係shopping換季嘅時候;目的地必須有似樣嘅shopping點。

作為德國五大最有錢城市之一,Regensburg竟然衰到連一間名店都冇。商場啲衫,全部都係沉色嘅多功能外套或者多功能行山褲之類嘅嘢,然後就係舖天蓋地嘅H&M同C&A;係一個悶到死嘅時裝災難城市。

題外話:H&M其實我ok嘅,反正都只係買basics同skinny jeans;但係馮太唔ok。

綜合以上嘅要求,布拉格同維也納之間嘅選擇,就在於我哋諗住使幾多錢。

大家留意返,布拉格係捷克嘅首都。但我識嘅捷克朋友都異口同聲話我聽,布拉格一啲都唔捷克;佢哋甚至認為,只有外國人先會當布拉格係捷克城市。所以,如果你想一嘗捷克嘅地道民風,你最好都係唔好去布拉格。

起碼,布拉格嘅第一語言,係英文;喺布拉格,使歐元多過使捷克克朗。

喺銀碼上面,布拉格係非常「澳門」嘅。我所指嘅係回歸前嘅澳門,樣樣嘢都俾香港平少少,但服務又好少少。喺Regensburg,兩個人食一餐中價意大利菜晚餐,大約四十歐。同樣嘅四十歐,喺布拉格,我哋可以喺downtown嘅頂級餐廳Como,食地中海fusion菜晚餐。

喺布拉格,只要你唔掂和牛,基本上二人晚餐點食都係五十歐之內;掂和牛就每位約一百,價錢差天共地。

至於shopping,布拉格睇嘅係日常便服同返工衫,或者一啲抵買嘅嘢;例如我老婆近期最愛嘅「波蘭Topshop」Mohito,同埋我呢期都幾ok嘅「男裝版Mohito」Reserved,喺布拉格就有地鋪,唔使網購或者托佢嘅波蘭同事搭單買。

另外一個喺布拉格shopping嘅原因,就係我哋呢班老香港嘅情意結 — Marks and Spencer。

瑪莎喺整個德國(Frankfurt例外),甚至維也納都冇鋪,但竟然喺布拉格有。去瑪莎,當然係買嘢食啦!蘇格蘭shortbread、茶餅、薑餅、夾心餅、拖肥糖等等;總之就係英國嘢。我呢啲老餅係「天祥」(Dodwell)同St. Michaels湊大嘅,對瑪莎有特別感情。

咁點解要去維也納呢?去維也納,使嘅錢更多,物價甚至比德國貴;但去維也納所享受嘅,係精品。去五星級酒店、甚至直頭去Cafe Sacher食Sachertorte,去食成隻碟咁大塊嘅吉列牛仔肉、去買designer labels、兩公婆dress up去國家劇院睇華格納歌劇;維也納可以話係中歐嘅六朝金粉。

特別嘅係,維也納有好多名牌boutique,唔係大集團開,你可以買到名牌之餘,仲可以從店主入貨嘅態度,睇到維也納嚟緊呢季嘅fashion trend,同店主對時裝嘅傳譯;唔係一味有牌子就ok,styling都好重要。

豪華係有代價嘅,維也納比德國同捷克貴。以一杯Latte Machiato嚟比較,喺Regensburg賣三歐、喺慕尼黑賣四歐、喺布拉格賣兩個半、喺維也納就要四個半甚至五歐。

個人認為,維也納有巴黎嘅藝術氣質,但冇巴黎嘅作狀,亦都比較user friendly。

我哋已經訂咗九月再去布拉格;至於維也納,或者新年後會去。

放假旅行,無非都係想搵個地方行開吓啫,唔使搞咁多嘢嘅。