蔡貞安情意結

明明迷戀 然而又不知怎向你形容

Courtesy: KBS2 水木連續劇《Suits》。究竟高聖熙係女一,定係蔡貞安係女一?起碼呢幅banner嘅構圖部份冇明確嘅答案。但係credit排名呢,就係陳熙瓊行先,然後先到蔡貞安嘅;應該係論資排輩。

雖然好有衝動想寫波,但感情上仍然哭緊波喪;所以都係免喇。寫女就唔同,寫女唔會傷感情。

喺呢度寫咗大半年嘢,就算唔係好上心都察覺到,呢類嘅題材,往往都係票房毒藥,可以話係收視低迷嘅保證;但係我又偏偏要寫喎。

唔尊重讀者意願?老老實實,由一開始喺Medium寫嘢到而家,我都真係冇好認真咁問過大家,你哋鍾意睇啲乜,但係又真係有啲捧場客喎。咁即係,我起碼寫啱咗啲嘢啦!既然啱,咁就唔好changing the winning formula喇。

實情係,我唔係唔識寫一啲好實用嘅文章,或者搵兩本書睇吓、學一啲三毫子哲學/理論然後喺度扮專家,甚至教大家創業(我都做過老闆㗎)或者移民,迎合讀者搏claps搏有錢袋。但係咁樣一嚟,Herr Fung就唔係Herr Fung喇。

人之患,在好為人師。都係嗰句,真係咁有心學嘢,就去買書睇啦!最好買英文書睇,三中商擺得最揚嗰堆「推介」如果真係有用的話,呢個世界仲邊有窮人?打書釘嗰班中坑個個都發過李嘉誠啦!


屌,又扯到母雷公咁遠。條題寫明蔡貞安,咁就入正題講女啦!

首先,副題句歌詞「明明迷戀 然而又不知怎向你形容」嗰個「你」字,其實係指我老婆。迷戀嘅,我係講緊蔡貞安。

每次當我講起「蔡貞安好靚」、「蔡貞安好有氣質」之類嘅話題,馮太都會有意無意間,俾咗一個表情我。一個好深層次嘅表情、好難用筆墨去形容;勉強可以解釋為「你睇女啲taste都好另類吓喎,點解你會娶我嘅呢?」

簡單一句,就係:「靚?你冇嘢呀盲炳?」

的確,係眾多嘅韓國女星當中,蔡貞安既唔係最靚嗰個,亦唔係最紅嗰個。長期擔當女二嘅佢,我相信香港人認識佢嘅真係唔多。

點解我會寫佢?因為佢係我第一個認識、第一個喜歡嘅「韓星」(其實當年佢連星都未算);甚至喺全度妍之前。

有一種愛,你永遠無法解釋;呢種叫「真愛」。

After all, who doesn’t like underdog?

話說去韓國工作嘅頭一兩個月,工餘時間,好多時都係對住部電視渡過。一隻韓文字都唔識嘅我,只有睇公仔。當時有個廣告,非常吸引我嘅注意。冇記錯的話,係一個Korea Telecom同LG便利店合作嘅廣告。廣告女主角,就係蔡貞安。

當年嘅蔡貞安,談唔上靚;我亦都唔知佢叫乜名,好耐都唔知。直到一段時間之後,同Chloe再次睇到呢個廣告,佢終於幫我揭開謎底;原來佢叫蔡貞安(채정안 )。

當時嘅我覺得,如果我將會有個韓國女朋友的話,應該就係咁上下樣。當然,識到Chloe之後,呢個諗法被推翻。

年輕嘅蔡貞安,其實唔算好靚。

初出道嘅時候,即係大約1999年,蔡貞安走嘅,係少女偶像歌手嘅路線;唱唱跳跳,一派潮女look,好MK。

韓國娛樂公司造新人嘅手法,咁多年都停留喺智障嘅層面。泫雅紅嗰陣,就周街都係泫雅喺度拋胸扭屎忽;秀智紅嗰陣就周街都係國民初戀。二十年前流行潮女look,於是通街都係MK金髮小麥膚色小背心熱舞;好似工廠啤出嚟咁,毫無性格可言。

You are what you see;當明洞街頭佈滿一式一樣嘅粉樣同中毒嘴唇時,有時候又唔怪得晒啲娛樂公司嘅。

當後來嘅韓國樂壇天后WAX出道嗰陣,都係咁嘅款著住bra top喺台上面扭;蔡貞安無可避免,都要以呢個look示人。當時佢嘅一首快歌《無情》,其實都hit過吓。

喺佢開始上位嘅時候,一套眼高手低嘅KBS韓劇《美娜》將佢煞停。雖然我證實唔到,但係蔡貞安嘅「長期女二」生涯,應該係由呢套劇之後開始。

一個半紅不黑嘅女藝人,最好做乜呢?嫁人。

蔡貞安喺05年閃婚,年半後閃離婚。(真係同是天涯淪落人……)

《咖啡王子》裏面嘅韓幼珠,係最靚最有氣質嘅蔡貞安。

然後就到《咖啡王子》登場。

以無論任何娛樂公式嚟計算,《咖啡王子》都係一套必紅嘅劇,結果亦然。蔡貞安以呢套劇嘅女二作為comeback,效果真係唔錯。

值得一提嘅係,呢套劇嘅造型師同化妝師都好錫蔡貞安,成套劇幾乎零死角,既冇over亦冇under,恰如其分咁素造出一個非常有氣質嘅美女。

女人唔過廿八,都未算真女人。呢個時候,蔡貞安啱啱三十。

一個女人,卅歲過後,唔會再以「靚唔靚」去衡量。卅歲後嘅女人,個Leading Indicator係「女人味」。

就好似劉嘉玲、就好似李英愛、就好似金南珠。靚唔靚嘅嘢,留返俾啲死𡃁妹去打崩頭;老娘行出嚟,就係用女人味浸死你。

卅歲後嘅蔡貞安,有冇女人味?我唔講喇,你哋自己睇啦。樓上九張都係佢近年嘅相。

留意上面組圖右下角嗰張相。係《逆轉女王》(역전의 여왕 )嘅劇照。《逆轉女王》其實係套爛尾劇 — 唔係佢爛尾,係下一檔嘅劇爛咗尾,所以《逆》劇要無啦啦加多十集去補位「攝期」。

做電視台編劇其實已經慘無人道,做一套爛尾劇嘅編劇就更加慘上加慘。試問有乜慘得過,劇情已經拖無可拖,要用過場甚至分鏡嚟拖?上集提要五分鐘、場景wide shot五分鐘、行五分鐘、坐低五分鐘、closeup五分鐘、開口五分鐘;唔好火可能已經掟電視。

咁點解仲要留意?因為金南珠+蔡貞安。有乜好得過一套劇有你嘅一杯茶?就係一套劇有你嘅兩杯茶;唔睇劇淨睇人都抵。呢兩個女人,非常有火花。

寫到尾,循例都落返首歌。蔡貞安呢首歌叫《죽어야 살까 》,即係「死了才能生存」。個concept究竟係點呢,我就唔深究喇,喜歡嘅就慢慢意會吓啦。只能夠講句,填詞嗰個唔知係咪韓國嘅因葵;我要花九牛二虎之力,先至大概明白佢想點。

呢首歌係上面提過嘅韓劇《逆轉女王》嘅其中一首插曲。蔡貞安以一個好平實嘅唱腔演繹,就好似你嘅朋友喺你耳邊訴說感情事一樣。喺呢個周街都《我是歌手》、連叫床聲都要飆高音嘅年代,呢種平實嘅演繹方式反而嚟得舒服自然。

歌嘅youtube片喺最底。歌詞係我自己譯嘅,因為除咗日文之外,乜嘢譯本都搵唔到;唯有自己出手。但你哋都唔會睇㗎啦,係咪?所以我都唔知譯得好唔好。佛系翻譯嘅嘢,係咁上下啦。

https://like.co/herrfung


죽어야 살까
누군가를 만나고 認識了某人
밤새도록 취해도 即使我整夜都喝醉了
지독한 그 사랑 잊을 수 없어 我仍然無法忘記那惡毒的愛情

잊으려 할 수록 생각이나 我越想忘記就想得越多
웃으려 할 수록 눈물이나 我越想笑眼淚就越多

안된단 것도 알아 我什麼都不知道
끝났단 것도 알아 只知道它結束了
하지만 난 돌아 갈 곳이 없어 但我沒有地方可以回去

칼날에 베인듯 너무 아파 它像刀鋒一樣傷害太深
멈춘 심장이 너만 찾아 停了的心中只有你

죽어야 살까 死了才能生存
죽어야 내가 살까 我要死了才能生存嗎
널 기억하는 我會記住你
날 버리고 날 버려봐도 即使你把我拋棄並離開我

죽어도 안돼 我不能死
죽어도 널 잊을 수 없어 即使我死了我也不會忘記你
잔인하도록 행복했었던 我為我的殘忍感到高興
우리 사랑이 그리워 我懷念我們的愛

니가 했던 얘기들 你說的話
니가 짓던 표정들 你的表達方式
어느새 가슴을 파고 들어와 狠狠的插入我心

가시가 박힌 듯 아프게해 它像荊棘一樣痛
아픈 가슴이 너만 찾아 只有腐壞的心才會尋找你

죽어야 살까 死了才能生存
죽어야 내가 살까 我要死了才能生存嗎
널 기억하는 我會記住你
날 버리고 날 버려봐도 即使你把我拋棄並離開我

죽어도 안돼 我不能死
죽어도 널 잊을 수 없어 即使我死了我也不會忘記你
잔인하도록 행복했었던 我為我的殘忍感到高興
우리 사랑이 그리워 我懷念我們的愛

차라리 모두 가져가버려 我寧願把它全部拿走
함께했던 기억도 我還記得
버려진 내 사랑 버려진 被遺棄 我的愛被遺棄
내 눈물들까지도 甚至我的眼淚
그 무엇하나 那算甚麼
몰랐던 때로 돌아갈수 있게 能夠在我不知不覺的時候回去

最後,又點可能冇咗呢張?

寫。 │ 粵文, English, 한국어, Deutsch.