當首爾仍是叫漢城的那些年(肆拾貳)

圖:Tobyhk ©

Boxing Day早上。

兩日兩夜。我哋兩個由平安夜開始,兩日兩夜冇離開過宿舍,三餐都係靠之前Chloe買落俾我嘅剩餘物資渡日(同埋偷食美恩姐姐整俾Ricky嘅泡菜)。今日再唔出街、起碼入返啲糧草的話,兩個「有情飲水飽」嘅懶人,好大機會會餓死。

Chloe有兩個壞習慣,之前已經知道嘅係,佢瞓唔夠時辰的話,係叫極都唔醒嘅;呢兩日知道嘅係,佢賴床情況非常嚴重。基本上,由佢醒咗,到佢終於捨得落床,冇一粒鐘都起碼大半粒鐘。

費盡九牛二虎之力,終於成功將佢拉咗起身。佢梳洗完後,返咗入嚟換衫。

換換吓衫、只係著住內衣嘅佢,突然間好似Victoria’s Secret啲model上身咁,騷首弄姿,然後問我:「我呢套內衣靚唔靚呀?」

我細心一望,款式似曾相識。

「我知你鍾意呢款,專登為你買㗎。」佢講嗰陣指一指我上次收埋Colette個bra嘅櫃桶,有少少面紅。

「好靚,但係你點知我會有機會睇到呢?」係囉,平安夜我去搵佢嗰陣,大家都仲係曖曖昧昧兼甩甩哋咁,未成事㗎。

「有備無患嘛!乜你唔知,女仔只會喺兩個情況之下,先會買新內衣嘅咩?」佢仍然有少少面紅。

「唔知呀,咩情況呀?」乜女人買嘢需要理由嘅咩?

「嘻嘻!蠢蛋嚟㗎。女仔去買新內衣,一係著開嘅爛無可爛,一係就買嚟著俾男朋友睇。」即係咁,呢個理論,當年Erika都有同我提過,不過係我唔上心咁解啫。

男人有興趣嘅,係女人嘅身體;胸圍底褲呢啲咁形於外嘅嘢,其實都係睇完就算。當身體某部份充緊血嗰陣(我意思係個腦),去到最後咪又係除得快好世界。

「但係,你又點知,我哋會喺嗰晚……有機會睇你嘅新內衣呢?」唔好話俾我聽,你長期收埋一套喺手袋等我上釣囉。

「唔知㗎,所以約親你都著定先囉!」佢眼眨眨咁望住我。

「嗰晚我冇約你喎……」係囉,你都避開咗我好幾日啦。

「嘻嘻,如果我真係唔想俾你搵到的話,就唔會去個咁易搵嘅地方啦!」咁又係,佢是但搵個不知名漢江公園坐低,由汝矣島去到九宜江邊,我聖誕搵到佛誕都未必搵到佢。

「咁你咪要買好多套囉?」投資咁多淨係為咗俾我除,成本效益成疑但係想法好可愛,值得推舉。

「幾套咁啦,嘻嘻!」佢係咁擺post。可以睇得出,佢開始可以好自在咁喺我面前展露佢嘅身體。但係佢再繼續咁扭落去都唔係辦法,於是我行埋去攬住佢,輕聲同佢講:「不如都係轉頭先出街咯。」佢kit一聲笑咗出嚟。


轉頭,終於出咗(我意思係出咗街)。再唔出街的話,一係餓死,一係攰死。

「有冇諗過,我哋呢幾日有咩玩呀?」佢問我。

「咁你想出去玩,定係留喺高陽市?」我反問;其實我乜idea都冇。

「留喺『貓貓城』。我唔想出漢城,好多人。」Chloe口中嘅「貓貓城」即係高陽;因為高陽市(고양시 /Goyangsi)同貓(고양이 /Goyangyi)只係一音之差,喺呢個傻妹口中就自然變咗Kitty City。

고양 고양시。唔知幾時開始,高陽市揀咗隻貓嚟做吉祥物。

「咁你唔使返屋企咩?阿爸阿媽唔會掛住你㗎?」女生外向應該係咁解。

「唔返!我要陪男朋友!」佢邊講邊繑住我。

的確,當有一個女仔,表現得事事以你為中心嘅時候,無論點都好,其實個感覺都係好心甜;呢種感覺,我從來未試過。

「女朋友,咁不如我哋去買定多啲餸同零食,然後租帶返去慢慢睇,好唔好?」我提議。

「好!我要煲劇!」雖然對我嚟講,煲韓劇係酷刑,但都就吓佢啦。

去Kim’s Club上完倉,我哋拎住六大袋嘢走。除咗乾糧麵飯同零食之外,Chloe仲買咗好多濕貨,連海鮮都有!我呢幾日應該都幾有口福。

買完餸,我哋去租帶。當我喺度揀緊啲首輪影片嗰陣,Chloe喺架嘅另外一邊叫我:「Alan,過嚟呢邊吖。」

佢嘅最大好處係,佢識得喺公眾場合尊重我,唔會一開口就大大聲「蠢蛋」咁叫我。

「原來呢度有香港劇㗎!你想唔想睇呀?」Chloe問我。

我細心睇吓啲劇,原來選擇都幾多,幾乎全部都係TVB嘅劇。

「不如你話我聽邊套好睇吖!」

我順住個架一直掃過去,哈!竟然呢套都有!唔,呢套嘢啱晒你啲韓國人睇喇!

「呢套!」我掹咗其中一盒帶出嚟。

「《大時代》?好睇㗎?」

「好啱你哋韓國人口味。」咁係吖嘛,死人冧樓死老豆掟仔掟女朋友落街,死得嘅死唔死得嘅都死,唔知係韋家輝的話,我仲以為係韓佬監製。

「好呀!我哋租晒返去慢慢睇!」Chloe似乎好滿意。



返到宿舍,我哋擺好晒所有糧草之後,Chloe將今晚要煮嘅海鮮處理好,佢話要整我「從未試過咁好味」嘅김치찌개 (泡菜鍋)。其實我上次同佢喺仁川食過之後,唔係太鍾意呢味菜。不過佢一再保證唔會好辣兼「從未試過咁好味」;好,我又睇吓點。

準備好海鮮,Chloe話要洗衫。梗係啦,得一套衫想喺度留成個星期,唔洗衫佢不如唔好著。

佢換晒啲衫出嚟洗,又一如呢兩日咁,著住我件恤衫唔著褲周屋走;睇嚟佢除咗對自己對長腿好有信心之外,對我嘅體格都好有信心。

開咗洗衣機,搞掂晒啲家務,我哋準備煲劇。Chloe喺廚房囉咗大包小包嘅零食出嚟,我留意到佢拎住盒紙巾。

「做咩拎紙巾呀?你食紙巾㗎?」我好奇。

「唔係呀蠢蛋,要嚟睇劇喊㗎!嘻嘻!」女人果然係用水做。

開始播劇。其實睇過《大時代》嘅都知道,套嘢係倒敘式嘅,一開始丁蟹就掟晒四個仔落街。Chloe睇完嗰場戲後,暫停咗套劇,對眼碌到兩個一百圜咁大望住我。

寫呢篇嘢嗰日係2018年2月5日,都未寫晒第二日港股就跌成千六點,丁蟹真係勁過沈大師。

「又話你哋啲香港劇唔會家破人亡嘅?一開始就掟仔落街,你哋啲香港導演變態㗎?」

「我諗住啱你口味嘛!你要點喊都得啦!」咁係吖嘛,三個月N套戲,九成以上佢都係喊住出戲院。

「我果然冇叫錯你蠢蛋!呢排睇新聞就已經日日係咁啦!你睇咗好多呢啲劇㗎?」佢皺一皺眉。

「唔係呀,我喺美國,好少有香港劇睇。」《大時代》Colette有睇過,佢嘅評語係「黐撚線」 — 廣東話直出,我冇翻譯。

「都好……你做蠢蛋好喇,唔好咁暴力,都唔好炒股票。」佢講完後繼續播劇。我唔敢話俾佢聽,睇落去邵仲衡會掟女朋友落街。

佢一邊開包蝦條、一邊將佢對小腿「晾」咗喺我大脾上面,84吋美腿,近在咫尺。日光日白咁睇,又有另一翻韻味;我輕輕將手放上去。

「我留意咗你好耐,你好鍾意我對腳咩?」佢陰陰嘴笑。

「ok咁啦。」非常極之好ok咁啦。

「嘻!咁你自便啦,我睇電視。」佢把口就話睇電視,但我知佢係笑住望緊我。


晚飯,全海鮮嘅김치찌개 。Chloe知我唔食得辣,佢落泡菜嗰陣輕咗手,辣味點到即止,海鮮湯嘅鮮味簡直係人間美味。飯後,仲有식혜 (甜米露)做甜品。

其實我之前,真係完全低估咗呢個女仔。我一直以為,佢只不過係個活潑可愛嘅鬼靈精,經常都有鬼主意,𠱁得我好開心,亦為我付出咗好多。呢兩日嘅情侶生活,我先至知道,原來佢仲有賢淑嘅一面。

一個識大體、識烹飪、有情趣、仲要咁靚嘅女朋友,其實我係個幸運兒。

當然,有個韓妹女朋友另外一樣好處,就係學到一啲大學都唔會教嘅「特別韓文」。

煲《大時代》大約煲到午夜,其實我預咗佢會煲通頂,我知道呢個係佢煲劇嘅習慣之一。但係喺呢個時候,佢停咗部錄影機、熄電視、然後同我講:

「不如瞓咯。」佢望一望我。

「你唔係鍾意煲劇煲通頂嘅咩?」我反問。

「나 사랑을 나누고 하고싶어 ……」佢笑得好曖昧。

「唔明……」我仲繼續戇dog dog。

「好快你就會明……」佢拖住我入咗房。

好明顯,入房唔一定係瞓覺嘅……

No one else can make me feel 
The colors that you bring 
Stay with me while we grow old 
And we will live each day in springtime

(待續)


https://medium.com/%EC%82%AC%EB%9E%91%ED%95%98%EB%8B%A4/%E7%95%B6%E9%A6%96%E7%88%BE%E4%BB%8D%E6%98%AF%E5%8F%AB%E6%BC%A2%E5%9F%8E%E7%9A%84%E9%82%A3%E4%BA%9B%E5%B9%B4-%E6%87%B6%E4%BA%BA%E5%8C%85-%E4%B8%8D%E6%96%B7%E6%9B%B4%E6%96%B0%E4%B8%AD-81d4a9b27c88

呢個系列有啲篇幅會係members only,但唔會係全部,我會盡量維持喺一個月三幾篇嘅members only文章,等免費用戶都有機會去選擇睇我嘅嘢(非會員每個月有三篇quota)。不過都係嗰句:寫稿佬都要食飯㗎,除非你真係好討厭我嘅文字,否則我都希望你會clap吓我啲文,尤其係members only嗰啲。俾clap又唔使你俾錢,當幫補吓我啲捱夜寫稿咖啡錢啦;感激不盡,多謝!
P.S. 手掌最多拍50下,都唔使另外俾錢嘅;希望大家唔好咁Facebook,拍多幾下鼓勵吓,多謝!

寫。 │ 粵文, English, 한국어, Deutsch.