當首爾仍是叫漢城的那些年(肆拾伍)

圖:Tobyhk ©

1991年冬,Santa Monica,Colette屋企門口。

我同Colette,一人一副孖葉,反扣住我哋雙手。我哋面面相覷,睇住對方俾孖葉塔住個樣。Colette睇睇吓,kit一聲笑咗出嚟;然後,我都笑咗出嚟。

「虧你哋兩個仲笑得出……」Amélie(Colette媽媽)望住我哋兩個大小白痴,原本皺晒眉頭,突然間都擰擰頭笑咗出嚟。

是咁的,Colette隔離屋個阿伯,養咗隻混種狗仔;隻狗仔好鍾意鼠過Colette個花園度大小二便。原本都冇乜問題,咪當施肥囉;但係Amélie喺花園度擺咗好多陶瓷公仔,隻衰嘢就專揀啲公仔嚟當燈柱小便。同佢主人講,阿伯仲鬧返Amélie轉頭;於是Colette決定教訓佢,偷咗佢隻狗,收埋喺後院嘅屋仔。

原本都係諗住玩吓,嚇吓個老嘢,點知個老嘢報警;差人查到嚟嗰陣,隻衰嘢又吠;於是全無犯罪天份嘅我同Colette斷正,人贓並獲。

「最衰都係你個死婆,諗埋啲屎橋!」我喺警車上面鬧笨賊Colette。

「你咁叻,你又唔阻止我?!」佢反駁。

「我費事到時我俾你鬧呀!」我其實甚少鬧佢,但嗰一刻有少少火火哋。

「我坐住咗對手呀!點解個手釦咁緊㗎?」佢試圖將對手移離佢個大籮柚,但係手釦太緊人太「論盡」,結果都係坐住咗。

「你兩個收聲好唔好!」車頭個差佬頂我哋唔順。

我同Colette如言收聲,個死婆竟然仲有心情嘟嘴。過咗冇一分鐘,Colette突然伏個頭喺我膊頭上面,笑住同我講:「Babe,我哋一齊俾人拉呀,Bonnie and Clyde咁,係咪好浪漫呢?」

我忍唔住笑咗出嚟。前面個差佬喺倒後鏡見到呢幕,結果都忍唔住笑。


學校講手當日晚上,一山警察署。

冇錯,結果我又俾人塔咗返差館。英雄救美係有代價嘅,做三分鐘英雄,我而家起碼喺度踎咗幾個鐘,仲未知幾時走得;一個唔好彩,可能仲有一兩碌跟尾。

呢鑊真係為女死、為女亡、為女打入雜差房。

我望一望隻表,成八點幾。佢哋塔咗我返嚟幾個鐘,乜都冇做過,淨係帶我入咗嚟呢間疑似落口供嘅房、解咗我個手釦、擺低咗杯水,然後就唔見人。坦白講,好悶呀!

我再望一望隻表,咦?個表面玻璃裂咗。乜我攤手咁大力嘅咩?諗返轉頭,所有嘢都係因為火遮眼,其實單嘢都唔關我事。但係佢出手打Chloe,咁就成件事唔同晒:一個我錫佢都嚟唔切嘅人,你夠膽郁手?有刀的話,我手都斬埋你落嚟。

對上一次打鑊大大鑊嘅,就係為咗Colette,因為佢喺我做嘢嘅disco俾人抽水;睇嚟,我條命都係要為女人打交。

Colette講得啱,我係個好衝動嘅人。

呢個時候,有人開門,係個比較後生嘅軍裝差人,拎住一盒疑似係飯嘅嘢。

「Din……dinner……」佢有啲口窒窒。

「감사합니다 !」我用韓文多謝佢。「실례합니다 !Officer, how long do I have to wait here?」問我照問,不過唔肯定佢識聽。

「Heah…no…Kolean Engalishe…man……we don’t know understand……you…wait……」我唔知原來broken English之上,仲有powder English;今日總算見識過。不過起碼佢都肯講,仲有啲押韻,算唔錯。

「알았어요 !」都係我轉台比較穩陣。「고맙습니다 !」係明白同多謝咁解。

阿Sir擺低咗個飯就出返去。我打開嚟睇,係泡菜炒飯;唔錯,呢間差館服務幾好。

壞消息係,我唔知仲要等幾耐,佢哋先搵到個翻譯嚟同我落口供,我好掛住Chloe呀!

頭先我上警車嗰陣,見到佢流住兩行眼淚、企喺一邊目送我離開,好似啲電視劇咁。見到佢呢個樣,我真係好心疼。男人不該讓女人流淚,呢幾個月,Chloe為我流淚都唔知幾多次;唉,我真係冇用。


悶到瞓著咗,過咗唔知幾耐,有人入嚟,又係嗰個差人。

「You, come」佢向我遞一遞手,我起身跟佢出去。

去到一個類似雜差房嘅地方,我見到一個西裝畢挺嘅鬼佬,同一個西裝畢挺嘅韓國人,喺度等緊我。

「馮先生你好,」個鬼佬開聲先。「我係美國駐南韓大使館嘅三等秘書,呢個係我哋嘅律師朴先生;」佢介紹佢身邊嘅韓國人。嘩,出到三等秘書咁俾面呀,呢啲嘢求其搵個Attaché搞點算啦。

「我哋收到國務院領事事務局嘅通知,有位Colette Dupuis小姐要求我哋嚟保釋你。」原來係Colette,佢之前係領事事務局嘅intern,應該係佢搵佢舊老細幫手救人;我諗係Sophie照我嘅emergency contact去搵佢。

有個熟政治又識打茅波嘅前度,其實都有好處。

「由於個事主唔肯落口供,警方冇足夠嘅證據落案,你可以走喇。」朴先生笑住講;好咯,唔使搞大龍鳳,慳錢慳時間。

「你女朋友喺外邊等緊你;」佢繼續講。「我哋搞埋啲手續就走得。」原來Chloe都嚟咗;咁又係,我唔信佢會掉低我自己返屋企。

朴先生幫我搞手續,其實都係簽返啲文件,好快就搞掂。韓國佬喺呢啲位好怕事,警察都唔例外;見到我有美國大使館嘅人嚟保釋,佢哋都想我早走早著,費事孭鑊。

搞好手續,我哋行返出報案大堂。我見到Chloe企咗喺度,對眼有啲腫,好明顯喊咗唔少;佢見到我,衝過嚟攬住我。

「我好掛住你呀!」Chloe攬住我講,講完又眼紅紅想喊。

「我咪喺度囉,冇事喇傻妹。」我錫咗佢額頭一啖。

「馮先生,我哋走先喇。」三等秘書先生同我講。「呢張係我嘅卡片,有咩事的話,你可以再聯絡我。仲有,Dupuis小姐叫我同你講,叫你有時間俾個電話佢。」

「唔該晒兩位,再見。」我向佢兩個道謝。


佢哋走咗,我同Chloe都行返出門口,行行吓去到出咗大閘幾步,佢停低咗,眼紅紅咁望住我。

「頭先你走咗之後,Sophie俾咗你個emergency contact我,佢要睇住Esther,唔得閒打電話,叫我幫手搵你屋企人。」Chloe聲線平靜,但對眼越嚟越紅。

「我一睇個contact,原來係Colette。我心諗,都好正常吖,於是我就打俾佢。」Chloe一面講,眼淚一面流落嚟。「可能係我仲好驚,可能係我唔知點面對Colette,我講嘢講到好急好亂。佢好nice,不斷叫我唔使驚、慢慢講。」

我女朋友同我前度通話,我諗我大約知道咩事喇。

「點知我越講越亂,到最後仲喊咗出嚟。Colette不斷咁安慰我,叫我唔使驚,佢會有辦法救你。之後佢留低咗我個電話號碼,話有新消息會再打俾我。收線之前,佢仲繼續安慰我。」

「過咗半個鐘,佢打返俾我,話已經搵到人救你,仲留咗呢邊大使館嘅contact俾我,同我講如果佢哋一個鐘內冇聯絡我,我可以搵佢哋;佢仲繼續安慰我,叫我唔好咁擔心。」佢繼續講,淚珠繼續喺佢面上落下。

「係囉,我都冇事啦,係咪?」到我安慰佢。

「我同你一齊之後,我一直都以為,我係你女朋友,我可以好好咁照顧你。呢個係我嘅國家、我嘅地方,冇嘢我會搞唔掂。」佢越講越喊得厲害。「點知你到出咗事,我竟然乜都做唔到、幫唔到你;最後都要你嘅前度女友出手,仲要安慰埋我、擔心埋我。」

「喺呢個時候,我先知道,原來你哋兩個先至係一對;我只不過係個不自量力嘅傻妹,拆散咗你哋,搶咗人男朋友。」講到呢度,Chloe已經泣不成聲。

我行埋佢身邊,想安慰佢;佢輕輕撥開我隻手,同我講:「你去搵返Colette啦,我好快會冇事;再見。」然後佢跑咗去路邊部的士前面,上車走咗。

我一時間唔知應該點俾反應,呆咗一陣。然後,我意識到,Chloe呢邊,只不過係半隻鑊;仲有半隻,喺地球嘅另一邊,等緊我爆埋佢。

我打俾Colette,同佢報個平安,佢好冷淡咁同我講:「你冇事就得啦,盡快改返個emergency contact啦。」

「究竟咩事呀?」我有少少唔耐煩。家陣我俾人塔喎,點解係你哋兩個發脾氣嘅?

「我同Chloe傾咗個電話,佢喊得好淒涼,叫我救你。喺嗰一刻,我先真正了解到,你唔再係我男朋友喇。」Colette解釋。從佢沙啞嘅聲音,我聽得出,佢都有喊過。「我一直以為,我會放得低,點知原來我冇自己諗得咁叻。」

「我仲好掛住你,我仲好緊張你,我仲好愛你。我暫時仲未適應到,俾啲時間我,我遲啲再搵你。」講完,佢收咗線。

Dupuis小姐,好似係你話要分手㗎喎!點解你講到,好似你係受害者、我係負心人咁嘅?

點都好,一件意外,傷了三個心。

睇住佢哋兩個咁,你估我真係唔心疼?

(待續)


https://medium.com/%EC%82%AC%EB%9E%91%ED%95%98%EB%8B%A4/%E7%95%B6%E9%A6%96%E7%88%BE%E4%BB%8D%E6%98%AF%E5%8F%AB%E6%BC%A2%E5%9F%8E%E7%9A%84%E9%82%A3%E4%BA%9B%E5%B9%B4-%E6%87%B6%E4%BA%BA%E5%8C%85-%E4%B8%8D%E6%96%B7%E6%9B%B4%E6%96%B0%E4%B8%AD-81d4a9b27c88

呢個系列有啲篇幅會係members only,但唔會係全部,我會盡量維持喺一個月三幾篇嘅members only文章,等免費用戶都有機會去選擇睇我嘅嘢(非會員每個月有三篇quota)。不過都係嗰句:寫稿佬都要食飯㗎,除非你真係好討厭我嘅文字,否則我都希望你會clap吓我啲文,尤其係members only嗰啲。俾clap又唔使你俾錢,當幫補吓我啲捱夜寫稿咖啡錢啦;感激不盡,多謝!
P.S. 手掌最多拍50下,都唔使另外俾錢嘅;希望大家唔好咁Facebook,拍多幾下鼓勵吓,多謝!

寫。 │ 粵文, English, 한국어, Deutsch.