當首爾仍是叫漢城的那些年(廿貳)

圖:tobyhk ©

Colette嘅離開同時亦為1997年漢城嘅仲夏畫上休止符,九月初嘅高陽,我已經感受到微涼嘅秋意。同樣係位處溫帶嘅華盛頓,九月亦同樣開始入秋。我仲記得,喺我哋位於馬利蘭州嘅apartment,每逢入秋,秋風都會吹得掛喺露台邊嘅風鈴叮噹作響。我彷彿見到初秋嘅黃昏,Colette披住我嘅長袖牛津紡恤衫、企喺風鈴下面、倚靠住露台門睇日落嘅倩影。

除此之外,我個腦仍然不斷咁loop住,喺機場閘口,Colette回頭望我嗰個帶淚嘅笑容、一個「黯然銷魂」嘅笑容。

點解秋天總係要帶住淡淡嘅愁懷?


「我俾你,你又俾返我,你個低能仔!」電話傳來Colette嘅嬌嗔,但語氣溫婉。

「人哋交換戒指,我哋交換銀紙。」我知呢句廣東話喺佢嘅認知之上,佢應該聽唔明。

「乜嘢鳩換雞子?」佢學我講廣東話;教不嚴、師之惰,罪過罪過。

「冇,我話好掛住你啫。」為免其他精子卵子春子之類受到牽連,我轉返英文台。

「我都係,好掛好掛,嘻嘻!」分手分得佢仲咁鬼冤氣我都係第一次見。

佢走咗幾日,我終於有時間整理我嘅思緒。我好感激Colette花咗一晚嘅時間,將佢嘅疑慮同解決方案毫無保留咁同我分享,我更加感激佢將我哋呢份感情放喺一個咁重要嘅位置、花咁多心思去保護。

只不過,對於佢嘅解決方案,我總係隱約覺得有啲唔妥。

問題係,我諗唔到其他更好嘅辦法。我係一個對伴侶百分百信任嘅人,如果Colette認為呢一注係值得押上嘅,我選擇信任佢嘅判斷。

「除咗錢同鍊,收到我送俾你嘅其他禮物嘛?」Colette問我。

收到,半打我著開嘅CK底褲吖嘛。老實講,我好唔慣人哋買一啲咁私密嘅日用品俾我,即使嗰個係咁親密嘅人。

「其實仲有其他㗎……」吓?我個喼吉咗喇喎,我都唔見有其他嘢。

「其他?咩嚟㗎?唔見嘅?」

「嘻嘻,你慢慢就會搵到㗎喇!」Colette故作神秘。


午飯時間,學校後樓梯「煙格」,我、Kirsty、惠晶嘅日常煙聚。其實惠晶係唔識食煙嘅,係咁打煙炮,但係佢又貪玩,係都要跟埋嚟。

「約莫咁高左右啦,」惠晶用手比畫。佢同Kirsty形容緊Colette;當住我面嗰隻。「眼大大鼻高高,身材一般啦,都算幾靚女嘅。」身材一般算幾靚女……死𡃁妹,信唔信我攝你入碎紙機?

「法國人定美國人?」Kirsty問我。

「媽媽法國、爸爸美國、法國出世、美國長大。」我答;答得詳細係想快啲講完呢個話題,早死早超生。

「法國女仔,應該好浪漫㗎。」Kirsty嘅評語;當然,佢唔知Colette係個好practical嘅法國妹,最浪漫嘅都只不過係餵我食pizza一人一啖。

其實,如果真係要喺我哋呢六年感情入面,雞蛋裏挑骨頭的話,我諗,最大嘅問題,係我哋欠缺情侶間應有嘅火花。Colette係個好好嘅生活拍檔、佢會係個好老婆、甚至係好媽媽,但似乎唔係一個好情人,因為佢個人太實在、太實際。

悲觀啲講,今次嘅分手,可能係佢喺呢六年內,做過最浪漫嘅行為;機場嘅一幕分手戲,仲有啲淒美𠻹。

但係,唔浪漫都算係問題咩?

「哈哈!你哋仲盤問緊Alan同佢個法國女朋友?」Ricky加入煙聚將我帶返嚟現實,正好我可以搵位閃。

「你仲未講你哋嘅初戀喎!唔准走!」惠晶見我走,想欄住我。

「關你咩事呀,八妹!」Colette叫佢Baby girl,我叫佢Bitchy girl。我輕輕拍佢個頭,然後走人;對付呢個粗魯嘅女仔,係要用返啲粗少少嘅方法。

我當然記得,Colette提醒過我,話惠晶對我「有啲嘢」。但係坦白講,一來我真係唔覺惠晶對我有啲乜嘢;二來我都唔覺自己咁有吸引力。女朋友就係咁,總係覺得其他女人對佢男朋友有意。真相係,其實唔係咁多人想搶你食過嗰碗魚蛋粉。

講返轉頭,其實我咁早閃人,都唔係完全因為怕咗佢哋嘅八卦。早走另外一個原因,就係今日又要出移民局,攞身份證(外國人登錄證)。

作為一個登咗陸/錄嘅外國人,我對張證其實冇咩感覺,事關都攞到簽證做到嘢,張卡對我嚟講意義唔大。不過後來Kirsty同我講,將來如果我想租車買車、出電話合約、甚至簽租約等等,都要呢張卡。佢咁講一講,又好似有啲用。

去到移民局,好快就搞掂;講真,都唔預會喺呢個位有乜阻滯,早排仲玩唔夠咩!卡到手,我望一望個英文名:

Alien Registration Card

Alien唔係《異形》咩?我知你哋啲英文爛,但係可唔可以用個好啲嘅詞彙?Foreigner唔得咩?唔識串呀?點解一定要Alien呢?

當然,當年嘅我入世未深,唔知道除咗韓國,好多其他國家(包括歐洲諸國、日本等)都係用Alien呢個term嚟officially形容外國人。

異形登錄證近年版本,其實同當年差唔多,hi tech咗嘅。

返到學校,交咗張登錄證俾惠晶影印同filing,我特意叫佢幫我scan一個copy,save落floppy度(仲有冇人記得咩係floppy?),我想俾Colette睇吓佢隻異形男朋友。

「哈哈哈哈!除咗我之外,終於有人揭穿咗你嘅真正身份喇!」Colette喺ICQ嘅反應。

「我係異形咁你係咩?」我有啲唔忿氣。

「我都係,不過未俾人揭穿!你小心啲呀,因住佢哋捉你去做實驗,同人類配種,姦咗你!哈哈!Shush!細細聲唔好俾人知呀……」佢個腦總會諗埋呢啲嘢。

(待續;下一集,另一重要角色登場。)

https://medium.com/%EC%82%AC%EB%9E%91%ED%95%98%EB%8B%A4/%E7%95%B6%E9%A6%96%E7%88%BE%E4%BB%8D%E6%98%AF%E5%8F%AB%E6%BC%A2%E5%9F%8E%E7%9A%84%E9%82%A3%E4%BA%9B%E5%B9%B4-%E6%87%B6%E4%BA%BA%E5%8C%85-%E4%B8%8D%E6%96%B7%E6%9B%B4%E6%96%B0%E4%B8%AD-81d4a9b27c88


呢個系列有啲篇幅會係members only,但唔會係全部,我會盡量維持喺一個月三幾篇嘅members only文章,等免費用戶都有機會去選擇睇我嘅嘢(非會員每個月有三篇quota)。不過都係嗰句:寫稿佬都要食飯㗎,除非你真係好討厭我嘅文字,否則我都希望你會clap吓我啲文,尤其係members only嗰啲。俾clap又唔使你俾錢,當幫補吓我啲捱夜寫稿咖啡錢啦;感激不盡,多謝!

寫。 │ 粵文, English, 한국어, Deutsch.