當首爾仍是叫漢城的那些年(卅捌)

戀戰 • 서울 (起)

圖:Tobyhk ©

1997年11月,亞洲金融風暴。

韓國係其中一個受到重創嘅國家;作為一個普通市民,我首先係見到股市暴跌,然後係貨幣貶值,隨之而來嘅係裁員、倒閉、失業、破產。直到我離開嗰日,韓國仍然未能完全走出陰霾。

對於好多港豬嚟講,別國貨幣暴跌,除咗唔係悲劇之外,仲係去旅行嘅好時機;慳錢抵玩吖嘛!慳幾多呢?假設你喺亞洲金融風暴去南韓,五千銀酒店機票咁先算,大約慳一千。因為有得慳,所以「你最好跌多啲!」

為慳一千銀,港豬絕對唔介意其他人家破人亡。「人哋屋企死人最好做乜?梗係睇吓有冇平嘅二手嘢執啦!」

慳錢當然冇問題,人哋跌咗你去玩都冇問題;仲推動經濟𠻹!但係唔好望人哋跌囉!更加唔好望人哋仆街所以貨幣跌,好缺德。問題係,won跌又好、yen跌又好、英鎊跌又好、歐元跌都好,好多港豬就隨即屎忽插香、祈求「跌多啲,我去玩就平啲」。

對於呢類港豬,我唔想講啲太涼薄嘅說話,我只想講一句:有報應㗎,自己睇路啦。(或者已經報咗呢,睇吓2018年香港嘅樓價,對比呢班人存摺嘅四/五位數字)

Alicia係我嘅其中一個學生,16歲,婷婷玉立。同一般16歲少女一樣,Alicia愛笑愛玩,亦愛追星。係佢教識我聽S.E.S.、嚴正化、金炫廷呢啲當年嘅偶像歌手。

金融風暴爆發,Alicia嘅家庭因為投資失利,首當其衝重創。爸爸生意被接管、破產,家庭頓失經濟支柱。年紀少少嘅Alicia認為自己不事生產,又要龐大嘅學費及生活開支,係父母嘅負累。1998年初某寒夜,由十幾樓嘅屋企一躍而下。

16歲,連真正嘅人生都未正式展開,Alicia就退場。喺我兩三年嘅居韓日子中,Alicia唔係唯一一個、因為唔想「負累」家人而自殺嘅青少年。呢個亦都係咁多年以來,我一直對韓國嘅悲情文化反感嘅原因之一。

Alicia、Jenny同Chloe雖然認識唔係好耐,但感情唔錯。佢哋兩個當Chloe係大姐姐,Chloe亦都好喜歡同佢哋分享扮靚甚至感情心得。Alicia嘅死對Chloe打擊好大;對我打擊都好大。

呢個世界上,冇任何事物,比一個十六歲女仔嘅靈堂,更令人心碎。

遺照上嘅笑容、靈堂上嘅香燭、十字架、靈堂前嘅玩具公仔、未曾停止過嘅啜泣聲;構成一個非常違和嘅景像,控訴現實世界嘅荒謬:呢個小女孩,唔係應該七十年後先會走到呢個終點嘅咩?

以下嘅小故事名為《Pepero Day》,係我送俾Alicia嘅小故事。

雖然我只係同你過咗一個Pepero Day,但你同你啲同學嘅笑容,我呢廿年來都冇忘記。希望你老師我不解溫柔嘅低能故事,可以令到喺另外一個世界嘅你會心微笑。

(唔好意思各位,個lead重手咗少少。只能講句:血仍未冷。)


11月11日,所謂嘅「빼빼로 데이 」(Pepero Day)。

咁究竟乜嘢係Pepero Day呢?你首先要知道,乜嘢係「빼빼로 」(Pepero)。Pepero其實係一種「百力滋」類零食,喺香港,我地食嘅牌子係固力果嘅Pocky,餅乾條加一層朱古力。嚟到韓國,呢類零食就自然係樂天(Lotte)嘅世界。

喺80年代,樂天製菓有一班天才「孖屐亭」,諗到將11月11日訂為Pepero Day,喺呢一日,朋友間要互相請對方食Pepero,女仔就會以Pepero向心怡嘅人示愛。經過咁多年嘅發酵,去到九十年代尾,Pepero Day喺韓國,經已成為第二個情人節。

點都好,同樣係商人搞出嚟谷銷路嘅日子,Pepero Day點都好過後來中國某條貌似蒙古症患者嘅老千商人,搞個乜撚嘢「光棍節」坤人上淘寶買老翻同十蚊三條T-back。

你哋家陣就睇到我喺呢度細數Pepero Day嘅歷史,但係當年仲係戇鳩鳩嘅我,對呢個節日一無所知,尤其係「示愛」嗰part;幾乎搞到一鑊粥。


早上,照常上課。我返到學校,一入門口,就見到惠晶喺到分配Pepero。

「早晨,食唔食呀?」惠晶遞咗一盒俾我。

「搞乜呀?咁多朱古力條嘅?」我接咗個盒望一望。

「今日係Pepero Day嘛,呢啲係俾你哋請學生食㗎。」佢邊食邊講。

「乜嘢係Pepero Day?」啤啤夫day就聽得多。

「總之就係請啲𡃁仔靚妹食Pepero嘅日子啦!」惠晶冇我咁好氣。

「哦。」我正想返入教員室。

「你同我企喺度,開咗嚟食先好走!」惠晶欄住我。

「食咪食囉,做咩唧?」我如佢指示,開咗盒Pepero;都好,橫掂未食早餐。

「我費事你轉頭送俾嗰個女人呀!」惠晶口中嘅「嗰個女人」,當然係Chloe。

自從嗰日,Chloe嚟代課,兼喺眾人面前「插旗」之後,雖然韓文未必有呢個詞彙,但惠晶已經將Chloe當成「狐狸精」。佢嘅理據好簡單,就係之前仲見住我同Colette好地地,轉個頭就話分手,然後「嗰個女人」就出現兼示威,唔係狐狸精係咩?

「你試吓轉送俾佢吖,我放瀉藥落去!」惠晶繼續恐嚇我。

「得得得!我食,ok?」我當住佢面食,以免佢啲瀉藥誤中副車。

食完「早餐」,我同George去上堂。一入班房門口,十三件𡃁仔𡃁妹已經衝晒過嚟,一路念念有詞「Pepero! Pepero!」咁,一路伸手嚟攞Pepero。

我家陣爭你哋錢呀?

George貌似好enjoy咁派Pepero。喺幼稚園班入面,佢永遠都係有愛心嘅暖男,我永遠都係《430穿梭機》裏面嘅周星馳。

寫到呢度,我不得不讚吓樂天諗呢條橋出嚟嘅marketing人員,一個成功嘅marketing champaign永遠都會令你搶住俾錢買佢嘅嘢;嗰啲要你like同share佢個page仲要tag你兩嗰friend嘅所謂marketing champaign,極其量都只不過係濕鳩孖屐亭。


中午,煙聚。

「我食唔到喇,太甜;Alan你要唔要?」Kirsty係第一個投降嘅同事,佢連飲咖啡都唔落糖,Pepero咁甜佢點頂。

「我都食到有啲滯;Ricky你嚟。」我遞咗俾Ricky。

「咁快滯?可能Chloe都有買俾你喎。」Ricky一邊食一邊講。

「係喎,Alan,你同你個model女朋友點呀?」Kirsty鍾意叫Chloe做「model女朋友」,我諗係因為Chloe嘅身高,同埋同某人酷似嘅關係。

「無乜點,咪又係咁。」係囉,你想我點答你?

「你同Colette分手,真係好可惜呀……」Kirsty有時係好似啲長輩咁諗嘢嘅。

可惜?遺憾?對我嚟講,無奈比較貼切。


七點,終於派晒全日嘅Pepero配額,放學放工。

「Alan,你有冇買俾Chloe呀?」Alicia揚一揚佢嗰盒。

「唔關你事。」我答。

「Well, you should. 女仔要𠱁㗎!」佢一副愛情專家嘅口吻。

「懶叻!」我串佢。「你拍過拖咩?」

「唓!你夠未同韓國女仔拍過拖啦,」Alicia還拖。「你又點知我懶叻?唔俾我真係叻㗎!係喎,你而家同Chloe拍拖,咁Jenny之前見過嗰個鬼妹點呀?你究竟有幾多個女朋友㗎?仲有冇收埋啲中國妹、日本妹、台灣妹、濟州妹、釜山妹、大邱妹……」十六歲嘅佢,經已練成阿媽嘅「一輪嘴」神功。

「信唔信我成盒Pepero連盒質你呢個高陽妹食晒佢?」我作勢捉住佢;佢閃開,伸一伸脷藐我。

行到走廊嘅一半,我已經見到漢城妹Chloe(其實佢唔係漢城妹,按下暫不表)嘅身影; 我再睄下我身後嗰幾隻高陽妹,我知呢次走唔甩會俾人玩。

去到reception,夏威夷妹惠晶啤住我,用細聲但係Chloe會聽到嘅聲線同我講:「Collect your girlfriend and get lost.」

呢個時候,Chloe見到我,企起身,攬住我錫咗啖;全場所有妹起哄。

我講過,Chloe係passive-aggressive嘅高手,呢啖佢應該係錫俾惠晶睇嘅,意思係:你唔妥我,但你吹得我漲咩!

「Alan你幾時同Chloe結婚呀?」Jenny永遠最關心嘅係婚姻狀況。

「我行慢咗睇唔清楚,可唔可以慢鏡重播?」講嘅係Alicia;其實行得最近嗰個係佢。

Chloe一邊好甜咁笑,一邊用韓文趕佢地走。我睇得出,其實佢好享受呢種被認同嘅甜蜜。

晚飯,我同Chloe去咗Pizza Hut。

「蠢蛋,我有啲嘢送俾你呀!」Chloe送咗盒圓桶形有碎果仁嘅Pepero俾我,唔知點解,佢有少少含羞答答:唔知係因為燈光效果定射燈太猛,佢好似有少少面紅。

「多謝!但係我夜啲先食得唔得?」食正餐前唔好食零食,阿媽教嘅。

「得!」佢表現得好開心。「幾時食都得!」


食完飯,送Chloe返屋企。由於聽日仲係工作日,我唔想去到咁夜;畢竟呢個都係天水圍去柴灣嘅距離。

唔知點解,Chloe今晚比平日更嗲。搭車嗰陣,佢仲出埋「擒拿手」 — 一隻手拖住我隻手、另外一隻繑住我手臂、頭伏喺我膊頭上;呢招就係傳說中嘅「拈花擒拿手」,鎖得實過手扣。

回程時,我一邊食Chloe送俾我嘅Pepero做宵夜,一邊諗緊佢剛才嘅嗲。坦白講,邊有男人會嫌女人嗲過頭㗎;Chloe雖然高咗少少,但係小鳥依人起上嚟,都有種嬌滴滴嘅感覺。

「小鳥依人」……咁高妹會唔會係「小鶴依人」?

(待續)

*서울 :漢城。

View at Medium.com


呢個系列有啲篇幅會係members only,但唔會係全部,我會盡量維持喺一個月三幾篇嘅members only文章,等免費用戶都有機會去選擇睇我嘅嘢(非會員每個月有三篇quota)。不過都係嗰句:寫稿佬都要食飯㗎,除非你真係好討厭我嘅文字,否則我都希望你會clap吓我啲文,尤其係members only嗰啲。俾clap又唔使你俾錢,當幫補吓我啲捱夜寫稿咖啡錢啦;感激不盡,多謝!

寫。 │ 粵文, English, 한국어, Deutsch.