當首爾仍是叫漢城的那些年(伍拾叄)

圖:Tobyhk ©

曾經有個做地產經紀嘅朋友同我講過,一世人流流長,總有一兩次「show time」時段,全世界聚焦喺你身上、睇你台戲。佢同我講嗰陣,佢嗰個月「爆數」爆得好勁,全公司頭三位;淨袋落袋都有廿幾卅個(港紙)。

以下呢篇文,就係我當時廿幾年嘅人生裏面、未必係最勁、但肯定係最多人睇到嘅「show time」。睇唔順眼?及早回頭是岸呀施主。我係咪晒緊命、晒緊嘢?或者啦。但既然係我做到,而你哋又做唔到嘅,你抵我晒啦講真。

唔好問我點解會做到,我都唔知,更加唔明。但千其唔好留言同我認真討論呢個問題;方丈份人好小氣㗎!

(我啲文有個不成文收視慣例,但凡寫我仆街舐嘢俾女耍條女有咗etc嘅文,都會幾收得。寫我有得威有得型仔嘅嘢就仆直,連慣性收視都冇埋、捧開場嘅會當睇唔到;今次又睇吓點。)


六月某星期六下午,狎鷗亭洞。

「蠢蛋呀,」Chloe一邊四圍視察,一邊問我。「我哋今日去邊一款嘅cafe好呀?」

「唔……」我其實都四圍望緊,但冇乜主意。「都係搵間靜靜哋嘅,可以睇吓書同聽吓歌就好喇。」

狎鷗亭洞、新沙洞同清潭洞呢三個區,除咗多豪宅之外,亦可能係世界上cafe密度最高嘅地區。只要由大街行入任何一條小街小巷,你就會見到,各式各樣唔同主題嘅cafe。我哋差唔多每個星期都會嚟一兩次,咁多個月,我哋都未幫襯晒;可能連一半都冇。

「金喜善씨 ?」講嘢嘅唔係我或者Chloe,係兩個著得幾潮、迎面而來嘅男人;佢哋係對住Chloe講嘅。

「唔好意思,你認錯人喇。」Chloe講嘢呢個表情好難形容,似笑非笑,似藐非藐。我將佢稱之為「죽어야 」(去死啦!)表情。

「吖……唔好意思,你同佢真係好似樣。」其中一個潮男道歉。然後,佢哋將注意力轉到我身上。

「呢位先生點稱呼?」潮男一問我。

我正想答之際,Chloe輕輕揸一揸拖住我隻手,然後串串哋咁講。「我朋友係外國人,唔識韓文;有乜幫到你?」其實呢個level嘅韓文我識嘅,不過我又想睇吓佢玩乜。

然後佢哋三個用韓文傾起上嚟。當三個地道韓國人用韓文傾偈時,其實我叻晒都係聽得五六成;太快同太多口語俗語喇。我勉強聽到嘅係「佢好啱我哋個job」、「唔會好耐」同埋「有興趣上嚟我office傾吓」。

然後潮男二俾咗張卡片Chloe,佢哋好有禮貌咁道別,然後走咗。

「咩事呀?」我冇理由唔好奇啫。

「嘻嘻!佢哋想搵你拍廣告呀!蠢蛋,今次你紅喇!」Chloe個表情興奮到好似搵佢拍廣告咁。

我拍廣告?唔係啩?兩條友著得咁潮,唔夠錢驗眼配眼鏡呀?


狎鷗亭某白色主題cafe。

Chloe眼金金咁望住我,望足五分鐘,連我叫佢唔好望,佢都唔理我;坦白講,雖然佢係我枕邊人,但係都望到我周身唔聚財。

「金銀美,你又想點呀?」我忍唔住再問多佢一次。

「我覺得你靚仔就好容易理解吖,」Chloe嘅笑容帶啲蠱惑。「原來都有其他人覺得你靚仔喎!」咁講算係讚定踩呢家陣?

「咁你有咩睇法呢?」我問佢。

「你想聽真心話定係𠱁你?」佢仍然一臉蠱惑。

「𠱁我。」其實我都幾enjoy佢讚我靚仔嘅,唔好當眾就得。

「Alan씨 你咁靚仔,唔去拍廣告嘥晒!你遲早紅過張東健!可能你到時拍劇,同真嘅金喜善做情侶!」好明顯,假金喜善唔係好識講大話。

「咁真心話呢?」我再問。

「上去同佢哋傾吓,最多嘥你一個鐘;唔得冇壞、有懷疑唔好做、真係清楚滿意先去玩吓,又唔係叫你轉行,咪當暑期活動囉!」又好似有啲道理。

「咁我同佢哋約個時間傾吓囉。」我望住張卡片。

「仲有我呀!」Chloe喺度傻笑。「我同佢兩個講咗,我係你經理人呀,嘻嘻!到時你要分佣俾我㗎。」小美始終都係要做返「小美」。


星期三下午,新沙洞某廣告公司會客室。

我同我嘅經理人「小美」上到廣告公司。坐喺我哋面前嘅,除咗係潮男一同潮男二,最令我意外嘅,就係有個香港人。

Christine係某時裝零售連鎖店嘅「孖襟」,亦係呢個job嘅客;睇外表應該未夠三十,短頭髮加副Gucci粗邊眼鏡;靚就靚喇,但係有陣「辣」味;典型brand manager樣。

我仲以為今日係上嚟casting,唔知個客都喺度;搞到我而家真係有啲緊張。

「Can I speak Cantonese with Alan?」Christine問在場其他人,當然係冇人有異議;包括我個「經理人」。

「Alan,呢位金小姐係你嘅……經理人、褓母定係女朋友?」佢指一指Chloe、笑住問我。

「三樣都係。」我笑一笑答佢。

「好多謝你今日抽時間上嚟。」Christine以公關口吻嚟個開場白。「我哋廣告公司嘅同事早兩日同我講,話搵到適合我哋公司暑假campaign嘅model。由於個campaign好趕,所以我哋都嚟唔切casting,直接就約你見面,目的就係等我見吓你。」

「Alan你有冇幫襯過我哋公司呢?」Christine問我。

「有,尤其係佢,」我指一指Chloe。「佢直頭係你哋嘅常客。」

的確,Chloe有一半嘅衫,特別係返工嘅恤衫同卡其褲之類嘅「斯文衫」,都係佢哋出品嘅。呢個brand喺當年韓國嘅大學社群入面,地位等同A&F,但係價錢冇咁狠;所以深受韓國大學生歡迎。

「多謝你哋兩位捧場。」Christine好客氣咁笑。「我哋一直都係用星嚟做model;但最近marketing嘅同事覺得,暑假嘅銷售季節,應該要launch一個新嘅短期campaign,用新面孔作招徠。所以我哋諗住搵個同韓國人完全唔同嘅新面孔、一個有陽光氣息嘅model。」

「同你見過面之後,我都覺得你好適合做我哋嘅model,一來你長頭髮、唔似韓國人,二來你夠健碩、黑黑實實、有陽光氣息;我哋希望呢輯硬照廣告比較自然同粗線條少少。」

「Christine,」我有少少猶豫。「唔係challenge你嘅審美眼光,但係我橫睇掂睇,有邊忽似個model呢?」

「哈哈!咁你又唔使咁謙;」佢打個哈哈之後答我。「其實你嘅身型同高度,都夠晒做model。至於點解揀中你,就係因為你一啲都唔似model,兼一啲都唔似韓國人。我呢輯相,就係想要一種新鮮感。唔知你有冇時間,或者有冇興趣同我哋合作呢?」

原來我之所以俾人睇中做model拍廣告,就係因為我一啲都唔似model。我越嚟越鍾意呢類唔知係讚定踩嘅comment;好鬼有深度。

我望一望我隔離聽到一頭煙嘅「經理人」,點一點頭。

「Brilliant!」Christine見我應承後,隨即轉返英文台。「So, let’s talk about the details.」

Details其實好簡單,個廣告大約需要拍兩日,但Christine話一般唔會超過一日。全部都係硬照,但係要換好多衫。

Christine將個plan同合約俾咗我哋,但係就要我哋簽一份NDA,可以自己睇,但唔可以傳閱。我最遲要星期五覆佢哋,然後下星期開工。

最緊要嘅係,個job有五百萬圜!即係三萬五港紙。

會面完畢,我同Chloe去咗附近嘅Baskin-Robbins食雪糕。

「點呀經理人,」我問Chloe。「你覺得點呀?」

「唔……價錢就真係好吸引,」Chloe一本正經咁答我。「其實個問題,最緊要就係問你自己:你想唔想拍廣告?」

「講真,玩吓冇壞嘅,又唔係真係轉行;而且,價錢的確係好吸引。」我答佢。

「咁我哋返去睇吓個plan同合約,冇問題就覆返佢哋囉。」佢正經得令我有啲擔心。

「小美經理人,你冇事吖嘛?」我問佢。

「冇事,」佢仍然係一本正經。「到時你紅咗,有好多女model埋你身,咁我點算呀?」

「你覺得我係啲咁嘅人?」我好認真咁望住佢。

「唔係,不過就算係都唔緊要,你紅咗我都一樣可以閹咗你;嘻嘻!」Chloe流露一個滿意嘅笑容。

好咯,佢真係冇事。


拍攝當日,廣告公司影樓。

「Good! Good! 嚟多個!Good! 轉身!Good!」攝影師一路引導住我、一路不停㩒快門;我感覺自己好似一隻參加緊狗展嘅威爾斯哥基。

Chloe全程企喺個攝影師附近,拎住支水同毛巾。當攝影助手測光嗰陣,佢就幫我抹汗同俾水我飲,然後先到化妝師補粉。佢對拍攝現場同運作嘅熟悉,令我覺得,佢應該做過model。

(注:其實Chloe高中年代真係幫當地某本Non-no式嘅時裝雜誌做過model;後來俾學校發現,罰停學兩星期。呢個經歷直接終止咗佢短暫嘅model生涯。但係拍攝當日,我仲未知呢件事;係事後佢講返俾我知。)

其實做model對於我嚟講,唔係新鮮事。早喺year 2嗰年,我喺LA就同樣試過,俾人喺街上面捉住,問我有冇興趣試。

令我有少少詫異嘅係,原來Chloe好識擺post。我一邊喺鏡頭前俾人影,佢一邊喺攝影師附近引導我去擺post;佢教我擺嘅仲係男仔嘅post,一啲都唔會姐手姐腳。

佢嘅表現,連Christine嘅目光都吸引埋;我睇得出,Christine對Chloe嘅「專業」好感興趣。

「Chloe,」Christine終於開口。「你有冇興趣,換套衫同Alan合照幾張?話唔定我哋可以用你哋嘅合照喎。」

Chloe有少少怕醜,但係都應承咗。我哋著埋相同嘅白色圓領tee、牛仔褲,一齊係佈景前面擺post。

我哋拍拖半年,其實都好少合照,因為唔係佢揸機就我揸機,我哋嘅合照唔多過五張。今次有機會喺專業攝影師嘅鏡頭前合照,我哋都好開心。

如是者係咁不斷除衫著衫,兩日(其實係一日多啲)嘅拍攝工作好快就完成。做model最辛苦嘅,唔係影相,係換衫;換到有少少腰痛。

(待續)


(有冇人聽過Kraftwerk呢隊德國組合?佢哋係電子音樂嘅先驅。呢首歌係佢哋嘅Das Model英文版,我覺得係四十年未out過嘅Techno殿堂級作品。)


https://medium.com/%EC%82%AC%EB%9E%91%ED%95%98%EB%8B%A4/%E7%95%B6%E9%A6%96%E7%88%BE%E4%BB%8D%E6%98%AF%E5%8F%AB%E6%BC%A2%E5%9F%8E%E7%9A%84%E9%82%A3%E4%BA%9B%E5%B9%B4-%E6%87%B6%E4%BA%BA%E5%8C%85-%E4%B8%8D%E6%96%B7%E6%9B%B4%E6%96%B0%E4%B8%AD-81d4a9b27c88

呢個系列有啲篇幅會係members only,但唔會係全部,我會盡量維持喺一個月三幾篇嘅members only文章,等免費用戶都有機會去選擇睇我嘅嘢(非會員每個月有三篇quota)。不過都係嗰句:寫稿佬都要食飯㗎,除非你真係好討厭我嘅文字,否則我都希望你會clap吓我啲文,尤其係members only嗰啲。俾clap又唔使你俾錢,當幫補吓我啲捱夜寫稿咖啡錢啦;感激不盡,多謝!
P.S. 手掌最多拍50下,都唔使另外俾錢嘅;希望大家唔好咁Facebook,拍多幾下鼓勵吓,多謝!

寫。 │ 粵文, English, 한국어, Deutsch.