無言感激(其實有言嘅)


啱啱收到Medium嘅email,睇一睇、嚇一跳。雖然,一百美金唔係好多錢,但係,我真係從來冇諗過,會喺呢度收到咁多錢;最初嚟Medium嗰陣,我根本就冇諗過,會收到任何錢。

US$109.33,Stripe兌返歐元€87,69。喺我呢邊,夠兩次二人晚餐;喺布拉格,夠兩次高級餐廳嘅二人晚餐,或者靚日本菜一餐;其實唔錯喇。

一個大叔喺度9up講「舊屎」,你都哋肯睇之餘,仲要肯拍手;你哋係咪傻㗎?(笑)

講笑啫,真係好多謝你哋捧場!頓首。

揸筆寫嘢十八年,第一次知道,原來真係有人睇㗎!其實都幾感動嘅。

原本諗住,好似史兄咁派吓錢,但係得嗰一舊水鎂雞碎咁多,無謂獻世;

原本諗住,好似波叔咁,請啲學生去海洋公園,但係得嗰一舊水鎂雞碎咁多,你哋又唔係學生,都係算喇;

所以,呢舊水都係留返俾我配老花眼鏡啦;寫三個月小說,近視深咗成百度呀!

其實除咗《漢城》,我每逢香港時間星期日朝早,都會出一篇隨筆;其實大家鍾意我寫啲乜嘢呢?可以提議吓喎。


星期五朝早,又有新一篇《漢城》喇!少少劇透:重要人物出場喎!究竟係邊個,佢又會搞啲咩出嚟呢?我同Colette又會點呢?

話說現實生活中嘅Colette,間唔中會上嚟google translate我啲嘢QC嘅(當然一隻字都睇唔明啦),佢叫我同大家講聲,佢真人靚過上鏡喎。

成廿二集你哋都係咁捱過咗,唔會喺呢個時候𠝹櫈離場㗎?記住捧場喇!

寫。 │ 粵文, English, 한국어, Deutsch.