寫字(三)


寫一啲人人都會睇到嘅嘢係一回事,寫一啲唔係人人都會睇到嘅嘢又係另一回事。

隨住際遇嘅流轉,我從傳媒業跳轉到政圈,一個比傳媒更敏感嘅行業。

但其實都係揸筆搵食;雖然我唔介意揸鎗,但這些機會……

作為議員助理,我同某白宮發言人一樣,間唔中都會幻想一下,自己係個身居要職嘅大內總管,喺政要身後面運籌帷幄、叱吒風雲。然而事實上,我只不過係換個地方換個對象咁繼續揸筆。

無論係區議會,定係立法會,我所寫嘅嘢,都不外乎係呢幾樣:

一)信:好。很。多。信。每封信都好很多副本,抄送全世界關事以至唔關事嘅人/部門。喺我嘅筆下,無論係街燈公廁欄杆僭建除蚊除蟲除草,到議案藍紙草案土地規劃財政預算施政報告,都變成關乎全人類安危嘅頭等大事。

二)講稿:speech writing係一件好能夠振奮人心嘅事,如果你係Ted Sorensen寫緊”ask not what your country can do for you, ask what you can do for your country”的話。可惜我唔係Sorensen,我啲老細們就更加唔係JFK,所以寫講稿基本上係一種折磨。

以我哋香港人講廣府話嘅速度,每秒講四個字係一個標準。即係一段七分鐘嘅發言,我就大概要寫1600字。

試想像你每個星期都要寫一篇千幾字但毫無養分嘅文字,久而久之,你會對文字失去感覺(if any)。

我都未講每次係現場或者CCTV睇返自己嘅講稿俾老細們面目全非咁讀出街嗰種非筆墨所能形容嘅無奈。

三)報告/表格:未喺議員辦事處坐過嘅人,係唔會明白,點解政府需要一個咁龐大嘅公務員團隊 — 梗係啦,唔係咁多人,點處理咁多唔同嘅報告同表格呀!買疊A4紙要填表,印咗幾多張傳單要報數,每個月嘅開支固然要報,連買部printer都要三份唔同嘅報價單;你以為寫講稿無養分,你又試吓係議會填表claim吓錢。

無養分還無養分,唔好諗住hea做。我試過喺選舉期間因為手民之誤,報少咗一條banner,結果?

我嘅bucket list度少咗「上ICAC飲㗎啡」呢一樣。還好,解完畫無事。

View at Medium.com
View at Medium.com

寫。 │ 粵文, English, 한국어, Deutsch.