亂緒

Photo by Tommaso Pecchioli on Unsplash

呢篇嘢主要係記載,我呢段時間腦海裏面嘅一堆雜亂無章嘅思緒。一如以往,毫無養份。如果你係嗰啲,睇人寫嘢要有得著嘅實用人士,請回。

(心底嗰句:睇嘢要有得著就去買書睇啦,cheap喱!又要有得著,又唔捨得俾錢,你當啲作者個個都識光合作用,唔撚使食飯嘅咩;你老味!)


差唔多一個月嘅時間,我完全冇寫作嘅意欲。對住《漢城》個結局,完全唔滿意,但乜都做唔到;總之就係唔想寫。

其實寫咗咁多年嘢,呢啲場面司空見慣。但係話分兩頭,成個月都冇心機寫嘢,又真係非常少有。

喺呢度睇咗幾篇,啲所謂writer教人點樣突破writer’s block嘅英文文章,對「寫作便秘」當然冇幫助;但係對「鳩噏當秘笈」呢五隻字就有啲新體會。

有篇嘢,個「作家」教人無論如何,每日都要坐低寫嘢 — 寫乜都好,總之每日都要寫啲嘢。咁樣寫寫吓,你就會每日有嘢寫,於是就唔會有writer’s block。

我心諗:你都黐撚線嘅!都話明寫唔出咯,我仲坐喺張書檯面前托咩!你會唔會叫個不舉嘅人,每日對住套AV choke半個鐘吖?如果每日係唔係都choke半個鐘就可以治陽痿,咁Pfizer執撚咗九年啦!仲邊使偉哥喎!手攰咪買支正骨水囉!

更大嘅問題係,呢啲咁嘅濕鳩文章,閒閒哋有一兩千claps!即係話,有為數唔少嘅人,真係以為每日對住三上悠亞choke半個鐘就可以治陽痿!咁我寧願信食砵仔糕治陽痿喇!起碼有嘢落肚先啦!

如果寫嘢有得迫,有得「無論如何」都要寫的話,呢個世界仲有窮人咩!我就真係未見過,迫自己寫出嚟嘅文章,會有好嘢囉。


冇幾耐之前,寫咗篇關於音樂嘅嘢,嗰陣仲大言不慚,話買咗支classical尼龍弦結他之後,唔會咁快買acoustic鋼弦結他;言尤在耳:


支Ibanez其實唔係好貴;我從來未買過貴嘅acoustic結他,之前喺韓國嗰支,都係本土品牌平嘢。呢支係我第一支全mahogany嘅acoustic,送貨嗰日,tune好音就急不及待一試,發覺真係唔同啲。

一分錢、一分貨;我開始明白,點解會有人花八九千歐元買一支結他。

買咗一星期,我手指頭上厚厚嘅繭又返咗嚟喇。曾幾何時,呢啲繭代表咗一種痛,同埋一種成就;而家,呢啲繭變咗一種甜蜜,一個十幾廿年冇見嘅老朋友重臨嘅甜美回憶。

原來,我對結他,都有種不能言喻嘅迷戀。


講開韓國,Colette上星期一家大細去韓國玩咗一個星期。一家大細去玩,輪流病是常識吧!佢個細仔喺韓國一落地就病,然後臨走前到個大仔。返到美國,輪到佢兩公婆病;好彩都係傷風感冒呢啲小病。

佢哋今次去韓國,全程係美恩姐姐招呼。我問佢,咁多年冇去,有冇乜嘢特別好玩?佢有少少疑惑咁答我:

「我個仔,好似鍾意咗美恩個女……」

我幾乎笑到收唔到聲。

佢個仔,即係佢個大仔,十三歲;美恩個女,十六歲。十三歲鬼仔,應該仲處於唔大唔細嘅「十三點」狀態;但係十六歲嘅韓妹仔,就應該開始識打扮,有啲少女味;難怪阿仔起痰。

「咁咪好囉,你同美恩做埋襯家,佢個女今年暑假去LA讀書,你又送你個仔去LA讀書,咪朝夕相對囉!」我唔肯定,我係答緊佢定玩緊佢。

「最弊個傻仔開口夾著脷,叫咗人哋做『細眼姐姐』呢……」Colette嘅原文係「Small Eyes Noona」;你慌唔係個傻婆教埋個仔啲唔咸唔淡韓文,咪出事囉。

最近睇咗齣韓劇,叫《經常請吃飯的漂亮姐姐》(밥 잘 사주는 예쁜 누나 ),係講兩個由細玩到大嘅姐姐同弟弟嘅姐弟戀。估唔到,現實生活中,分分鐘有可能上演一齣《經常請吃飯的細眼姐姐》;人生如戲,真係好好玩。

老實講,呢啲兩小無猜嘅故事,十居其九都唔會有下文。我覺得有趣嘅係:原來,我哋呢個圈子嘅友情,經已延續到第二代。(咁當然,叫完人哋「細眼姐姐」之後仲有冇友情,就有啲難講。)

二十年前,因緣際會將我哋幾個拉埋一齊;二十年後,我哋幾個其中嘅後代,又開始走埋一齊。呢種感覺,係一種難以形容嘅奇妙感覺。

或者,可以叫「感概」。


最後呢段,唔係思緒,唔係感想,係通告。

《漢城》嘅進度,經已去到接近第五十集。所以由五十集開始,會有更多嘅《漢城》,會係喺收費牆之內。咁做嘅主要目的,係想減少Facebook嗰邊嘅free rider。

之前嘅比例,係2:1,即係每兩篇免費文章,就有一篇收費。而家開始,會係1:1,即係一篇免費一篇收費。去到結局篇,將會完全behind paywall。

我明,好多人都會覺得,我又唔係咩名作家,憑乜嘢叫人俾錢睇我寫嘢?

啱㗎,我絕對同意;咁你咪唔好睇囉。

我只係唔鍾意,個個鬼鬼祟祟咁係Facebook link過嚟,睇完扮冇睇,但係就講是講非。既然連account都冇,就更加唔好講clap喇。但係就低智到,以為我冇數據,唔知佢哋睇過。

(其他我都冇乜嘢,最唔鍾意就係俾人講是非。如果你冇講我是非,咁我唔係針對緊你。)

至於一直捧開場嘅大家,多謝你哋,呢個決定並唔係針對你哋;希望你哋會繼續捧場。

https://like.co/herrfung


今次首歌係Carla Bruni嘅Stand By Your Man,亦係《經常請吃飯的漂亮姐姐》嘅主題曲。

寫。 │ 粵文, English, 한국어, Deutsch.