《當首爾仍是叫漢城的那些年》中期導讀

感謝、導讀、感想、廣告、微量劇透、未來、「是她也是你和我」。

首先,我仍然要喺呢度,多謝大家捧場。

其實,我都唔係第一次多謝大家。寫嗰陣,我都有諗一諗,究竟咁做,會唔會好虛偽,會唔會好假。

但眼見最近,有幾位KOL,一嚟Medium就燒人數簿,又顏色泡泡又廣東話寫嘢唔可以護衛人類挽救地球等等。我諗,我都係比較喜歡「禮多人不怪」呢啲傳統老餅思維。何況我又唔係KOL,唔需要「我屌故我在」。

所以,再次多謝大家!多謝你哋對呢個大叔嘅爛文字不離不棄。多謝兩位女主角,為我譜出生命中最美麗嘅一章。多謝我生命中最重要嘅女主角,對我不離不棄之餘,仍然堅持喺出稿夜凌晨,撐住睡意睇我最新出爐嘅新一章。

同時亦都恭喜大家。因為,你捱到呢一日,表示你已經捱過咗一半嘅《當首爾仍是叫漢城的那些年》。

新加入Medium嘅朋友,《當首爾仍是叫漢城的那些年》其實係一篇冗長嘅飲食指南暨食評;主要係介紹返,點樣喺韓國食韓妹嘅。(講笑啫,唔講邊有得笑喎)

《漢城》嘅初稿,我經已基本完成。當然,對我而言,一日未出街,一日都未算完成。因為我係嗰啲,出稿前十五分鐘都仲潤緊稿嘅人。根據我寫咗嘅,同埋未寫好晒、但已經有晒框架冇乜得變嘅結局,整輯《漢城》,大約有七十集(加減兩集)。

有朋友問,既然主角(即係我)現在已經有家室,咁《漢城》即係註定要悲劇收場啦?

喺呢度,我都無謂再賣關子喇。《漢城》的確係一個悲劇收場嘅故事。聰明嘅讀者,睇見種種《少年維特的煩惱》式嘅伏線,其實都可以略知一二;我再賣關子其實都冇意思。

我覺得,《漢城》故事最重要嘅,唔係結局,係過程。三個年紀相若、但係唔同種族、唔同背景、喺唔同地方成長嘅年輕男女,隨住機緣同命運支配下相遇,同時地面對感情、事業、生活、種族以至傳統價值等等各種衝擊所衍生嘅故事;結局喺呢度嘅意義,其實唔大。

鍾意睇輕鬆小品、兼且鍾意睇我俾女耍到陀陀擰嘅朋友,都唔需要擔心。結局還結局,《漢城》嘅成份比例,仍然係85%喜劇、15%悲劇。我從來都唔鍾意,韓劇式嘅哭斷腸情節;間唔中放粒沙石喺堆糖中間、唔覺意「𠼰」大家一嘢、揪一吓你哋個心,呢啲先係我嘅style。

更何況,《漢城》嘅結局,你肯定就係我、Colette同埋Chloe嘅故事結局?

請容許我喺呢度留白。

《漢城》嘅故事,其實係我埋藏喺心裏面嘅一個深層秘密。喺故事發生之後呢十八年來,我從來都冇主動同任何人提起過《漢城》嘅日子。好多我嘅朋友,甚至枕邊人,都只係知道我喺韓國生活過兩三年,但唔知道內容;知其然,不知其所以然。

無謂問我 一生的事
誰願意講 失落往事
有情 無情 不要問我
不理會 不追悔 不解釋意思

今次公開我呢段鮮為人知嘅心路歷程,當然唔係因為我想成為一個網絡作家。事實上,喺《漢城》嘅故事完成之後,仲會唔會繼續寫作,我都未決定到。《漢城》嘅誕生,其實有一個更重要嘅原因,容許我喺呢度賣個關子。我應承大家,喺全文出街之後,會有一個都幾詳盡嘅後記,交代一切。

有朋友覺得,《漢城》嘅情節有啲拖拉嘅現象;特別係我同Chloe嗰種「跳Cha-Cha」式嘅感情線,進兩步退一步,究竟要拖到幾時?

劇情拖拉係因為反映現實 — 我係一個喺感情上優柔寡斷、非常被動嘅人。由於係性格缺陷,所以劇情嘅拖拉膠著,似乎無可避免;大家忍吓啦,唔好意思。

(大家同時亦都可以設身處地咁體會到,當日呢兩個同我有感情關係嘅女仔,面對住優柔寡斷嘅我,係幾咁想摙死我然後棄屍荒野。)

喺呢度,我都想幫Chloe講句公道說話:佢唔係我同Colette之間嘅第三者。

二十年後,睇返成件事,Chloe的確係喺一個唔適當嘅時候出現。當時,我同Colette嘅感情,出現咗啲「問題」。Chloe喺一個敏感時刻出現,的確係加快咗我同Colette嘅分開。

問題係,就算冇Chloe嘅出現,係咪就等於,我同Colette可以白頭到老?Chloe出現之前,我同Colette經已鬧分手鬧咗好一段日子;甚至可以話,我同Colette嘅感情問題,直接促成咗我去韓國工作呢個決定。

如是因、如是果。講到尾,如果唔係我嘅出現,呢兩個女仔,根本就唔會有交叉點;要怪,就怪我。

喜歡Colette嘅朋友,可能對佢嘅黯然退場,覺得有啲可惜。大家唔使擔心,佢又點會捨得煩少我一陣吖!佢只係喺後台補緊妝食緊飯盒啫;大家放心追落去,唔知幾時,霞姨叫埋位,佢又會失驚無神彈出嚟,嚇你一跳!

亦有朋友問我,《漢城》會唔會結集成書?

我可以好肯定咁答大家:會。

問題係,究竟係我自資出版,定係有出版商錯愛。我唔係嗰種鍾意「猶抱琵琶半遮面」嘅人,如果真係有出版商有興趣的話(應該冇人會咁傻啩),我唔介意傾。

如果我自資出版的話,咁呢本書極有可能唔會喺市面出售。好有可能係,我sub完印一兩百本,然後送俾朋友或者個別長期讀者,留個紀念。

想出書嘅原因之一,係因為以目前呢種「章回小說」形式、每星期出兩三篇嘅做法,由於篇幅嘅限制,結果就係埋沒咗好多有趣嘅小故事。網上讀者係好現實嘅,呢期稿一跌walt,啲閱讀數字就會即跌。我雖然唔可以改變故事主線去迎合讀者口味,但係避重就輕、等大家睇得開心啲,我都仲做得到。

有啲旁枝故事,例如:我同幾個同事之間嘅生活瑣事、我同一啲萍水相逢朋友嘅故事、非洲同俄羅斯黑工嘅悲情故事、我同教會嘅故事、我同我啲學生嘅故事、我同惠晶嘅小故事等等,如果單獨一集或者半集咁出,就會支離破碎,甚至令到主線故事變得唔連貫。出書的話,就冇呢個問題。

亦即係話,日後嘅實體書版《漢城》,故事大綱一樣,但係細節會有唔同,篇幅會更長,亦都會更有生活味。有得亦有失,如果出書的話,咁好多歌詞同詩,因為版權問題,都會刪除。但如果自資出版、唔牽涉買賣牟利的話,又係另一回事。

講開詩,內文間中出現嘅詩詞,絕大部份都係辛波絲卡(Wisława Szymborska)嘅作品、同埋莎士比亞嘅《十四行詩》。我落詩嘅原因,唔係要扮高深扮文雅(你哋都知我毫不文雅);呢啲詩,全部都係Chloe嘅至愛。既然我要寫佢嘅故事,咁呢啲詩就係必需品。

成個系列,到目前為止,我最唔鍾意嘅,係個prelude。唔鍾意嘅原因,係我落錯歌 — 我唔應該用一首我討厭嘅歌,去開始呢個系列;我唔應該俾任何我唔喜歡嘅嘢,去浪費我嘅時間、沾污我嘅心血。

可以的話,我會改寫呢個prelude。

喺我心目中,《漢城》嘅真正主題曲,係呢首:

是她也是你和我
同相親相愛也相爭
大家偶遇在人海
你我各留痕

幾許歡與笑 多少愛和恨
那狂潮卷起 燦爛又繽紛

是苦也是甜美
人生的喜惡怎麼分
大家各自尋找
你我心中印

幾許哭與嘆 多少假與真
讓狂潮起跌 混合愛和恨

是她也是你和我
同悲歡喜惡過一生

頭四句已經道盡《漢城》呢個故事。大家想慳時間的話,聽完呢四句就唔使追落去;慳返你幾個月時間。

「是他也是你和我」。《漢城》呢個故事,除咗係我、Colette及Chloe嘅故事之外,亦都可能係你嘅故事。老土啲講句,每個人心中都有一個漢城;我同你嘅漢城,唔會一樣。如果我嘅故事,可以牽動到你嘅一絲感概的話,呢個就係《漢城》嘅存在價值。

寫。 │ 粵文, English, 한국어, Deutsch.