《漢城》嘅總字數

乜都唔講,起碼我結結實實咁打咗廿萬隻字。

我終於將所有《漢城》由Medium export晒落嚟、隔晒渣(export冇得揀export邊篇,我喺呢度嘅910篇嘢連留言一次過export晒)、逐篇load返落個word度、再clear埋formatting同啲唔啦更嘅嘢。咁樣整一整,整咗我成個禮拜。

廿萬字;又一次證明,呢個世界,只要有恆心,真係冇乜嘢係唔可能;發達除外。

喺你哋仍然等待緊每個星期二、五早上推出嘅結局篇之際,我已經開始「後漢城」嘅編輯工作。當首輪編輯工作完成之後(即係唔知幾時),我會將佢format成一個mobi file,然後放落google drive,供各位免費下載,作為多謝大家捧場九個月嘅小小答禮。

mobi版體驗;未完工㗎試片嚟咋。

然後,我會將編輯好嘅《漢城》,印大約100本,送俾我嘅朋友,同埋部份有份捧場嘅長期讀者。詳細情況係點,遲一步再公佈。

除此之外,隨住《漢城》嘅完結,我亦都開始構思新嘅故事。詳情係點,我會喺漢城嘅後記裏面稍作交代(稍作咋)。

但由於創作需時,由零開始建構一個故事,並唔係一件容易嘅事。所以,喺《漢城》之後,可能都會有一段稿件不接嘅時間。

喺呢段真空期,我盡可能會維持每星期一至兩篇散文,寫乜唔知,好大機會都係你哋冇乜興趣嘅嘢;例如:過期韓劇、過期kpop、過期韓星、或者時裝之類。希望喺所有讀者全數流失之前,或者我呃返嚟嘅三個top writer「名銜」全部流失之前,可以開始新嘅故事。

又由於搵題材寫散棍並唔係我嘅強項,而我又真係唔識寫實用文或者教學文(唔係唔識,係唔想啫;人之患……),所以萬一我散散吓散唔出,真係脫稿嗰陣,大家高抬貴首呀;我應該未死得住嘅。

另外,仲有一件值得開心嘅事:

估唔到,我咁都有1k followers嘅一日。我最初開始寫《漢城》嗰陣,我同自己講:「如果有兩三百followers就好喇。」結果超額完成。多謝大家,希望唔好咁快跌返落去。

最後都係嗰句,同情我不如俾錢我。呢篇嘢咁削,我真係唔好意思擺喺paywall裏面。下面有條banner,banner有個掣,唔知做乜嘅,但係click吓冇壞;每人最多click五次。(我咁講應該冇人可以舉報我乞clap喇啩?!)

https://button.like.co/herrfung